Ooyene yomavi oye na uuthemba wu thike pamwe

JANA-MARI SMITH

Omukiintu gwomoshitopolwa shaZambezi okwa sindanapo oshipotha mOmpangu yoPombandeelela moshilongo moka a li a ningi eindilo kombinga yuuthemba wuumwene wevi lye ndyoka a mono papango yuumwene wevi lyopamuthigululwakalo.

Pethimbo a gandja etokolo moshipotha shoka, Omupeha Omupanguli Omukuluntu mOmpangu yoPombandeelela mOshilongo, Petrus Damaseb okwa popi kutya sho epangelo lyaNamibia, Elelo lyondoolopa yaKatima Mulilo oshowo pamwe nayakwawo yahamano mboka ye li aayamukuli moshipotha shoka, sho inaya kutha ombinga moompata nepulakeno lyoshipotha shoka otashi ulike omukundu omunene kombinga yiikumungu yuuyuki.

Okwa popi kutya mboka oya tokola okukala inaya kutha ombinga moshipotha shoka omolwa okwaahenako na sha.

Willem Odendaal gwoLegal Assistance Centre, ngoka a kalelepo Agnes Kashela, okwa popi kutya etokolo ndyoka olya ningwa mOmpangu yoPombandeelela mOshilongo olya dhengele pevi omatokolo haga ningwa mOmpangu yoPombanda na olya gandja uuthemba wa faathana kaantu mboka ye na uumwene wevi wiikolelela koompango dhonale dhopamuthigululwakalo naamboka ye na uumwene wevi kwiikolelela koompango dhongashiingeyi.

Odendaal okwa popi kutya ekotampango nali kale tali gandja uuthemba wu thike pamwe kAaNamibia ayehe kutya omuntu oku li pevi lyopamuthigululwakalo lyaayehe nenge pevi lyopangeshefa, na ngele ope na oofuto tadhi gandjwa nadhi gandjwe kwiikwatelelwa kontopolwa onti 16 yEkotampango lyaNamibia.

Kashela okwa ka konga ekwatho kompangu yoSupreme Court konima shoHigh Court ya ningi etokolo moshipotha moka ta pataneke elelo lyondoolopa yaKatima Mulilo lya hiilitha po ehala lye nokonima olya tokola okulanditha po ehala ndyoka, omanga inali gandja iifuta yasha kumwene gwehala.

Okwa popi kutya okwa dhigulula ehala ndyoka pamuthigululwakalo okuza kuhe.

He okwa li a pewa oshitopolwa shevi ndyoka kelelo lyoMafwe Traditional Authority momvula yo 1985.

Konima sho oshilongo sha manguluka omavi agehe gaayehe oga ningi gepangelo nomomvula yo 1995 iitopolwa yimwe po yomavi ngoka oya pewa ondoolopa yaKatima Mulilo.

Pethimbo ndyoka, he yaKashela okwa li natango momwenyo na okwa tsikile okulala pehala ndyoka sigo osho a mana oondjenda momvula yo 2001.

Kashela okwa popi kutya elelo lyondoolopa ndoka olya kutha po evi lye nokuli hiilitha po koohandimwe naanangeshefa yamwe, nelelo olyiiyambapaleke okuza miifuta yohiila ndjoka.

Okwa pula opo ompangu yi vule okuninga etokolo ye a futwe iimaliwa mbyoka ya futwa onga ohiila muule woomvula ndatu ya thika pooN$720 000 kwa gwedhwa omwaalu gwondando moka evi tali landithwa, ompangu yopombanda oya li ya tindi eindilo ndyoka.

Damaseb kwiikwalekele etokolo ndyoka lya ningwa kompangu yopombanda kutya Kashela ke na uuthemba okumona iifuta yasha okuza kelelo lyondoolopa ndjoka, omolwa evi ndyoka lya tulwa momake gelelo lyondoolopa.

Damaseb okwiikaleke etokolo kutya evi ndyoka oli li evi lyaayehe ndyoka li li momake gepangelo, ta popi kutya elelo olya li ya pula opo li fute Kashela, ihe okwa tindi ta pula opo a futwe omwaalu guli pombanda

Okwa tsikile kutya omukiintu ngoka okwa kutha ko uumwene wevi ndyoka pamulandu gwomondjila, konima sho he a hulitha, pamilandu noompangu dhopamuthigululwakalo.

Metokolo lye Damaseb okwa popi kutya uumwene wevi kwiikwatelelwa koompangu dhopamauthigululwakalo nawu simanekwe naantu naya ihumbatelwe nuuthemba wafaathana naamboka woompango dhoshinanena.

Okwa gandja etokolo oombinga dhoka dhi tsakanene muule womasiku 10 opo ya vule okutsa kumwe ko ku kundathanwe woo egandjo lyiifuta kumwene gwevi ndyoka.

Oshikumungu shoka osha ukithwa natango kOmpangu yoPombanda, naDamaseb otaka ulika omupanguli ngoka taka ungaunga noshikumungu shoka, opo shi manithwe unene tuu kombinga yiifuta .

Oonakupatanekwa moshipotha shoka, oyo taya futu iifuta yopaveta yaKashela.