Oosekuriti otadhi mono iihuna

Ehangano ekeeli lyomaliko lyaNamibia otashi vulika li falwe kompangu mbala sho okambaapila kondjambi yomuniilonga ka ulike kutya ehangano ndyoka natango otali futu aaniilonga ondjambi yopetameko ndjoka yali ya tulwa miilonga mo-2009 yooN$3.80 mowili sigo omuKotomba gwomvula ya piti.

Okutameka mo-2009 ondjambi yopetameko yoosekuriti oya gwedhelwa sigo opooN$7 mowili na okwa tegelelwa dhi gwedhelwe okuya pooN$8.75.

Levi Shigwedha, Omunashipundi gwoSecurity Association of Namibia (SAN), okwa koleke kutya ehangano lyoSuperior Security Services otali konaakonwa noSAN otayi pangele okukakonga ekwatho lyopampangu meyambidhidho lyomahangano ganiilonga.

Simon Kandondo, Amushanga-Ndjai Namibia Independent Security Union (NISU) okwa kunkilile aaniilonga ayehe mboka haya futwa oondjambi dhili pevi ya konge ekwatho komahangano gaaniilonga.

Okwa popi kutya aaniilonga mboka nando kaye shi iilyo yoouniona na ya ka konge owala omakwatho otaya ka kwathelwa.

Mwene gwehangano ndyoka, Andreas Haingura Karupu, okwa popi mEtitatu lyoshiwike sha piti kutya okwa ndjekepo ondjambi yopetameko okuza muKotomba naaniilonga oya futwa muNovemba ondjambi yooN$7 mowili.

Omapopyo ge inaga vula okukolekwa pethimbo onkundana ndjika ya nyanyangidhwa, naSAN inayi vula okukoleka ngele shoka ta popi oshi na tuu uukwashili.

Okambaapila komafutilo goondjambi dhoSuperior Security Services oka pewa oshikundaneki shoNamibian Sun na oka ulike kutya omuniilonga okwa futwa ondjambi yooN$850 muKotomba konima sho a longo oowili 220. Moowili moka omwa kwatelwa oowili dhomalutayima 55 oshowo oowili dhokulonga uusiku.

Okambaapila hoka otaka ulike omuniilonga ngoka a nanwa oshimaliwa shooN$200 sholweendo oshowo shonyama. Ina nanwa iifuta yoSocial Security Commission.

Karupu okwa gandja uusama wiifuta yili pevi kaayakulwa kutya nonando okwa hala okufuta aaniilonga ye pampango, itashi vulika molwaashoka aayakulwa inaya hala okufuta omwaalu gwiimaliwa guli pombanda.

Okwa popi kutya ngashiingeyi okuli moonkundathana noSAN oshowo omahangano goounion nuuministeli waaniilonga opo ya vule okukandula po uupyakadhi mboka.

Pamaiyuvo ga hololwa kaadhani nkandangala moshikondo shoka, otaya pula opo omahangano ngoka itaga gwanithwa po ompango ndjoka gaungaungiwe nago.

Okwa li kwa tulwa miilonga ondjambi yopetameko yaaniilonga yooN$3.80 mo-2009 na oya li ya gwedhelwa sigo opooN$5.30 mo-2014.

MuAguste gwo-2015 iifuta mbyoka oya gwedhelwa sigo opooN$7, noshiwike sha piti oya gwedhelwa ishewe sigo opooN$8.75, na tayi tulwa miilonga muJanuari twa taalela.

JANA-MARI SMITH