Oontamanana dhaNdonga itadhi hulu

Okugwedha natango konkalo ndjoka, gumwe gwomookansela ya kuthwa miilonga melelo ndyoka moshikandjo shaShongwe, Kashona kaMalulu, okwa popi ishewe oohapu dhilwe ndhoka dha tadhi hwahwameke natango oontamanana melelo lyaNdonga.

Malulu okwa lombwele oNamibian Sun kutya oya tseyithile omupeha omunashipundi gwomalelo gopamuthigululwakalo gahetatu monooli yoshilongo, Elenga Enene lyUukwambi, Herman Ndilimani Iipumbu, opo iidhope moshikumungu shoka, ihe Iipumbu okwa tsakanene owala nOmukwaniilwa Immanuel Kauluma Elifas ihe ina galukila we ookansela mboka.

Elifas oye omunashipundi gwomalelo ngoka monooli.

“Otwa tumu osheendo opo shi ka popye naye a vule okuya moonkundathana nomukwaniilwa gwetu, Okwa zimine nokuya kombala yaNdonga ihe ine tu galukila we na okwa tindi okupopya natse,” Malulu ta ti.

Iipumbu okwa zimine koNamibian Sun kutya okwa li a yi kOnamungundo momasiku 23 gaApilili ihe okwa tindi okupopya kutya etalelepo lye olya li lya shike.

“Otwiipyakidhila nokulongekidha oshituthi shomagongo na otandi ka vula owala okumu tseyithilwa kombinga yoshikumungu shoka, konima yoshituthi shomagongo,” Ipumbu ta ti.

Malulu natango okwa koleke kutya oya tseyitilwa kutya omupeha presidende Iyambo naye okwa li a yi kombala yaNdonga omwedhi ga piti, ihe okwa indikwa opo a ye mo mombala. Elalakano lyetalelepo lyaIyambo kali shiwike.

“Pethimbo ndyoka tse otwa kuthwa mo nale mombelewa yelelo, ihe ope na mboka ya mono osheendo she sha yi kombala ihe inashi pitikwa shi ye meni.”

Ombelewa yomupeha presidende inayi vula okutya sha kombinga yonkundana ndjoka, sho ongodhi yomuyakuli gwe gwopaumwene Moses Pakote inayi pita, ihe oshifokudnaeki osha popi noonzo odhindji ndhoka dha koleke kutya Iyambo okwa li a tindilwa okuya meni lyombala.

Okutila omahooli momulilo, natango okwa tukuka epiyagano mOlyomakaya ga piti sho amushanga gwoOTA ngoka a kuthwa miilonga Joseph Asino pamwe nakansela nale na okuli ngoloneya nale gwaShikoto, Vilho Kamanya ya thindikile Fillemon Shuumbwa Nangolo komutumba gwoompangu dhaakwashigwana, pamwe naminista Albert Kawana, mOndangwa.

Sho ya pulwa, Asino naKamanya oya popi kutya oyali ya hiwa opo ya kale momutumba ngoka, nehiyo yawo olya endele mombelewa yaOTA.

“Ombaapila yehiyo oya tothamo kutya oolye ye na okukala momutumba ngoka.

Ngame onda hiwa onga amushanga gwoOTA, Kamanya onga omupanguli gwoshigwana shaNdonga naNangolo onga omukalelipo gwomukwaniilwa gwaNdonga,” Asino a popi.

Sho a ningilwa omapulo, ngoka ta longo pehala lyamushanga gwoOTA, ngoka a li nale omugameni gomupresidende nale Sam Nujoma okwa tindi okutya sha.

“Ngele owa hala ndi tye sha nena lombwela ndje tango kutya oonzo dhoye oolye. Ngele hasho nena itandi popi sha,” Nepando ta ti.

Omwedhi gwa piti Omukwaniilwa Immanuel Kauluma Elifas okwa shanga ombaapila tayi tseyithile amushanga gwElelo lyOndonga Traditional Authority (OTA), Joseph Asino kutya okwa tokola okumu kutha miilonga pamwe nomalenga ngaashi John Walenga oshowo ngoloneya nale gwoshitopolwa shaShikoto, Vilho Kamanya oya tidhwa mo melelo.

Ookansela yamwe mboka ya tidhwa ongaashi Kashona kaMalulu, Joseph Akawa, Tonata Ngulu naFillemon Nambili.

Elifas natango okwa shangele Nangolo ombaapila ta popi kutya euliko lye onga omulanduli gwe olya kuthwa oonkondo.

Malulu okwa popi kutya yo inaya kuthwa miilonga oya tidhwa mo owala moombelewa dhelelo, okwa popi kutya mboka ya kutha ko oombelewa dhelelo kaye na ko nasha niipambele yelelo ihe oombelewa owala.



ILENI NANDJATO