Oondjembo tadhi longithwa unene momiyeka kwa homatiwa

JANA-MARI SMITH

Opolisi yaNamibia oya ningi omakonaakono giipotha yomiyekwa kwa homatiwa yi li pe 760 pokati komvula yo 2016/17 oshowo 2017/18 omanga iipotha yomiyekwa kwahomatiwa yi li po 135 ya lopotwa pokati kaApilili oshowo Juli nuumvo.

Iipotha mbyoka oya londo pombanda okuza piipotha 356 pokati ko2016/17 kuya piipotha 402 pokati ko 2017/18 omanga iipotha yi li 135 ya lopotwa muule woomwedhi ndhoka ne.

Omiyalu ndhoka dha hololwa kopolisi odha ulike kutya miipotha 770 2016/17 kwa lopotwa iipotha 425 omanga iipotha 345 ya lopotwa pokati ko 2017/18.

Pokati komwedhi Apilili nomwedhi Juli nuumvo okwa lopotwa iipotha 110, moka mwa lopotwa oondjembo dha ulikwa omuntu.

Pokati komvula yo 2016/17 iipotha yonkambadhala yedhipago yi li 203 moka mwa longithwa ondjembo oya lopotwa nokukonaakonwa kopolisi nomwaalu ngoka ogwa shuna pevi piipotha 181 moshikakomvula sha landula.

Opolisi oya lopota iipotha 35 yomadhipago ga ningwa noondjembo momvula yo 2016/17, niipotha o 30 oya lopotwa momvula ya landula.



Pokati komwedhi Apilili oshowo Juli nuumvo okwa lopotwa omadhipago noondjembo ge li 24.

Omiyalu ndhoka odha holola natango kutya pokati komvula yo 2016/17 no 2017/18 opolisi oya konaakono iipotha yi li 274 yokukala noondjembo dhaahena oombapila, moka iipotha 134 ya lopotwa momvula yo 2016/17, omanga iipotha 140 ya lopotwa momvula yo 2017/18.

Nuumvo muule woomwedhi ne, pokati kaApilili naJuli, okwa lopotwa iipotha yi li pe 140.

Iipotha yuulunga woondjembo yi li pe 159 oya lopotwa mo 2016/17 omanga iipotha 180 ya lopotwa momvula ya landula.

Pokati kaApilili gwonuumvo nomwedhi Juli okwa lopotwa iipotha yuulunga woondjembo yi li 51.

Omvula ya piti, oshiputudhilo shoInstitute of Public Policy Research (IPPR) osha pititha omukanda kombinga yekondololo lyoondjembo moNamibia oshowo iimbuluma tayi longwa noondjembo moshilongo. Olopota ndjoka ya pitithwa koIPPR oya holola kutya oondjembo dhi li 1 811 okwa lopotwa dha kana momvula yo 2008/2009 oshowo 2016/2017.

Nonando ongaaka olopota ndjoka oya lopota kutya omadhipago ga ningwa nondjembo ogeli evi, nomadhipago ogendji oga ningwa niilwitho yilwe ngaashi oombele.

Omwedhi gwa piti, oshifokundaneki shoNamibian Sun osha lopota kutya otaku ningwa omamanitho montotwaveta yi na sha noondjembo oshowo iikuti, ndjoka ya gandjwa momutumba gwopashigwana opo yi kundathanwe.

Okwa popiwa kutya omalundululo ngoka taga ningwa mompango ndjoka, oga kwatela mo omakonakono taga ningilwa ooyene yoondjembo opo ya talike ngele otaya vulu tuu okukala noondjembo ndhoka megameno. Natango okwa popiwa kutya omakonaakono otaga ka ningilwa aaningi yomaindilo okumona omikanda dhokukala noondjembo omanga inaya pewa uuthemba mboka opo uuministeli wu kale nomauyelele gomondjila kombinga yuumwene woondjembo.

Aaningi yomaindilo goondjembo otaya ka pumbiwa okuya komadheulo nomapulaapulo taga ningilwa aakwanezimo yawo, ookuume oshowo yalwe, ko ku talike ngele otaya vulu tuu shili okukala noondjembo.

Momalunduluko ngoka oga kwatelamo natango elelepeko lyomikanda dhuumwene woondjembo konima yethimbo lyontumba.