Oondando dhiikulya nomahooli tadhi londo pombanda

Aalandi okwa tegelelwa ya ka longithe omwaalu omunene gwiimaliwa, sho oondando dhiikulya oshowo omahooli kwa tegelelwa dhi ye pombanda nuumvo.

Nonando aaniihauto oya li ya mbalipalelwa kashona muule woomwedhi dha piti sho ondando yomahooli ya gu pevi, egwo pevi lyondando yomahooli italit sikile we sho oondando kwa tengenekwa dhi londe pombanda.

Shoka osha tseyithwa komunongononi gwonkalo yeliko, Klaus Schade.

Egwo pevi lyondando yomahooli noN$1 molita yopetrol oshowo ooN$0.40 momahooli godiesel – olya etitha opo ondando dhi gwe pevi sigo oopresenda 5.1 momwedhi Desemba.

Natango nonando oondando odha gu pevi, egwo pevi nooN$0.90 molita momahooli gopetrol oshowo noN$1 momahooli godiesel, ondando yomahooli oyi li pombanda momwedhi Januari, naashoka otashi ka etithwa kelondo lyoondando, pahapu dha Schade.

Schade okwa popi kutya okwa dhidhilikwa e yo pombanda lyondando yepungu etokele, oshowo iilya momalanditho goSouth African Futures Exchange.

Namib Mills okwa londeke oondando dhiilandithomwa ye iikando iyali omvula ya piti. MuKotomba gwo 2018 ondando yomausila oya londo noopresenda 20, olwishi 20 omakoloni 16 omanga omahangu ga londo noopresenda 12.

MuJuli oondando odha londo pombanda sho omausila ga londo noopresenda 3.2, olwishi oopresenda 4.4 omanga omakoloni ga londo pombanda noopresenda 3.3.

OGONE TLHAGE