Omukuluntuskoa a pula aalongi ya pangelithe iipundi niitafula yoskola

Omukuluntuskola poskola yedhina Uukumwe Combined School momudhingoloko gwaOshivelo, moshitopolwa shaShikoto, Moses Manze ngoka ta gandja ombedhi kaalongiskola omolwa omaliko goskola ngoka ga yonagulwa, okwa gandja elombwelo kaalongiskola yamwe po opo ya kale ya pangelitha iipundi niitafula mbyoka ya teka omanga oskola inayu fudha mesiku lyotango lyaDesemba.

Omulongi poskola ndjoka ngoka ina hala edhina lye li tumbulwe okwa lombwele oNamibian Sun kutya, Manze okwa ithana aalongi yopakathimbo ya ne poskola mpoka na okwe ya pe elombwelo opo ya pangelithe iipundi niitafula mbyoka ya teka moongulu dhawo. Omukuluntuskola ngoka okwa lombwele aalongi mboka kutya oya pumbwa okupangelitha iinima mbyoka ngele oya hala ookondalaka dhawo dhiilonga dhilelepekwe. Omulongiskola ngoka okwa popi kutya keshi kutya omolwashike aalongi mboka ye na okwiihumbatelwa ngaaka komukuluntuskola.

“Aalongi hayo taya teya iipundi niitafula ihe aanaskola, noshitiyali ke na uuthemba wokuningila aalongiskola omatilitho. Ngele omulongi okwa teya oshinima ope na omilandu ndhoka hadhi landulwa.” Sho a ningilwa omapulo, Manze okwa koleke kutya okwa pula aalongi ya pangelithe omaliko goskola ngoka, ihe okwa tindi kutya okwa tala owala kaalongi yopakathimbo.

Okwa koleke kutya okwa ithana aalongi mboka yopakathimbo yeli yane mombelewa ye ihe okwa popi kutya okwe shi ningi konima sho a tseyithile aaniilonga ayehe poskola, pethimbo lyoshigongi shoka ya li ya ningi. Manze okwa popi kutya omolwa onkalo yompumbwe yiimaliwa ndjoka ya taalela epangelo, oskola itayi vulu okutsikila nokukala tayi pangelitha iipundi niitaafula mbyoka tayi teka.

Okwa popi kutya ota gandja ombedhi kaalongi omolwa eteko lyiinima mbyoka molwaashoka aalongi oye shi ninga omukalondjiigilile okukala ka ye li mootundi pethimbo aanaskola taya ilongo omutenya, naashoka otashi etitha aanaskola ya teye iinima molwaashoka kaye na ekondololo lya sha. Ngele owa tala kiipundi niitafula yomondondo yotango nontiyali iinima mbyoka oyi li owala nawa na inayi teka ihe ngele owa tala mondondo ontine okuya pombanda, iipundi niitaafula moondondo ndhoka oya teka molwaashoka aalongi ihaya kala moongulu pethimbo aanaskola taya ilongo omutenya yo ihaya ningi omalongekidho ga sha, nopethimbo ndyoka aanaskola ohaya kala taya nuka kombanda yiipundi niitaafula shoka hashi etitha eteyo lyiinima.”

Omukuluntuskola okwa popi kutya okwa longitha iimaliwa ya thika poN$7 000 okuza mondjato ye mwene opo a pangelithe iinima mbyoka tayi teka poskola oshowo eshina lyokuninga ookopi.

Sho a ningilwa omapulo, Omukomeho gwElongo mOshikoto, Lameck Kafidi okwa popi kutya ke na ontseyo yonkalo ndjoka onkene ita vulu okutya sha.



KENYA KAMBOWE