Omukithi gwoNewcastle gwa dhipaga oondjuhwa 4 000

Sha landula konima nkene kwa tukuka omukithi gwoNewcastle mOnooli yaNamibia, oondjuhwa dha thika po- 4 000 odha si komukithi ngoka na okwa lopotwa woo iipotha ya thike po-400 yomikithi gwoshipa shiimuna.

Sho a gandja uuyelele koshifokundaneki shoNamibian Sun kombinga yomukithi ngoka, ngoka ta longo pehala lyamushanga mUuministeli wUunamapya, Omeya nIihwa, Sophia Kasheeta okwa popi kutya omukithi ngoka ogwa dhidhilikwa miitopolwa ngaashi Oshana, Omusati, Ohangwena nOshikoto.

Okwa tsu omuthindo kutya ope ma omilandu dhoka dha tulwa miilonga opo ku yandwe okutaandelithwa omukithi ngoka, ngaashi iikonga yomantuntilo, nomahwahwameko taga ningwa moshigwana.

Okwa popi kutya uuministeli wawo inawu mona natango olopota kutya ope na aantu yontumba ya ehama konima sho ya li onyama yoondjuhwa dhoka dha si komukinti ngoka.

“Otatu kunkilile nomuthindo oshigwana opo ka shi lye oondjuhwa dhoka dha si komukithi ngoka nenge dhoka tadhi ehama,” Kasheeta ta ti.

Kasheeta okwa holola kutya omukithi gwoshipa miimuna ogwa dhidhilikwa lwotango muApilili omvula ndjika moRooibult, VatiraPost, De Hoek noSukkelaar Post mOtjombinde oshowo moKalkpan mEpukiro.

Iipotha ya thika po-436 oya lopotwa konima nkene omukithi ngoka gwa dhidhilikwa tango, omanga iipotha 433 ya dhidhilikwa mOtjombinde, itatu omEpukiro. Oongombe ne okwa lopotwa dha sa.

Okwa tseyithwa woo kutya Namibia ita pitikwa a tumwe onyama yongombe momalanditho gaChina uule woomwedhi 12, sha landula etukuko lyomukithi ngoka.

ELLANIE SMIT