Ompumbwe yoomangestrata mOshakati

ILENI NANDJATO

Ompumbwe yoomangestrata mompangulilo yaShakati, oya etitha eundulilo komeho lyiipotha, okuza muApilili nuumvo.

Omunambelewa okuza mompangululo moka okwa lopotwa ta longo pehala lyamangestrata na ota undulile iipotha komeho okuza mompangulilo ya A na C omolwa ompumbwe yaapanguli.

Oshakati oyi na oondunda dhokupangulila dhi li 4 ihe omu na owala aapanguli yatatu, na yaali owala ngashiingeyi taya longo.

Omupanguli mompanguulilo ya A, Cynthia Matiti okwa thigi po iilonga muMaalitsa omanga omupanguli mompangulilo ya C e li mefudho.



Onzo yimwe oya lombwele oNamibian Sun kutya omolwa omwaalu ogundji gwiipotha, oomangestrata mboka yaali ye li miilonga ngashiingeyi itaya mono ethimbo lyokuka kwatela komeho iipotha mompangulilo yaA oshowo mo C.

“Aantu mboka ye na iipotha tayi pulakenwa mompangulilo ya A nenge mo C ohaya uhala pompangu esiku alihe, ya tegelela ngele aapanguli mboka yaali ye li po otaya mono ethimbo opo ya kwatele komeho iipotha yawo. Ngele shoka inashi ningwa nena okuza po 14:00 omunambelewa ohayi a ka undulile komeho iipotha mbyoka.”

Shoka olundji ohashi uvutha nayi aakwashigwana mboka haye ya koompangu ihe ohaya uhala owala esiku alihe mpoka kaye na shoka taya ningi.

“Ethimbo limwe aakwashigwana ohaya tameke taya ula omalaka aanambelewa yoompangulilo ngele oya uhala inaya kwathelwa.”

Oshikondo shoompangulilo osha popi kutya otashi ka popya tango naangoka ta longo pehala lyomukomeho gwoompangulilo Harris Salionga omanga inashi yamukula.