Omona gwaPohamba a geelwa koshigwana

Ongundu yaakwashigwana ya thika po 500, oya geye noonkondo kiilonga yakansela gwoshikandjohogololo Ondobe,

Mandume Pohamba, ngoka taya popi kutya okwa tulitha mevi omunino kagu na oshilonga ngoka gwa longithwa owala kaanamagumbo yatatu okutulitha omeya momagumbo gawo.

Konima sho omunino ngoka gwa tulwa po, aakwashigwana oya pewa okapomba komeya kaayehe hoka ka teka oomwedhi omulongo dha piti na inaka pangelwa sigo onena. Aakwashigwana oya popiwa kutya oya li ya dhilaadhila kutya otaya ningi owala omeya gawo gopaumwene, nokukutha oowili momunino ngoka, ihe oya lombwelwa kutya shoka itashi vulu okuningwa.

Etompelo kutya omolwashike mboka itaya vulu okukutha mo omeya, oondyoka kutya omunino ngoka omushona ,na itagu ka vula okugandja omeya kwaamboka yaha okukutha mo omeya. Aakwashigwana oya popi kutya oya iyamba okutha omunino ngoka gwomeya, konima sho kansela gwawo e ya uvanekele kutya uuna omunino ngoka gwa pu otaya ka vula okukutha mo omeya gawo gopaumwene nokutula momagumbo gawo. Monena momunino moka omwa kuthwa owala omeya komagumbo gatatu.

Shoka osha kolekwa kuPohamba yemwene sho a ningwa naye oonkundathana koNamibian Sun, naasho a pulwa kutya omolwashike a pitika opo epangelo li longe omunino ngoka itagu vulu okukuthwa omeya koshigwana, okwa yamukula kutya enenedhilaadhilo olya li okugandja omeya koshigwana, naashoka osha ningwa.

Okwa popi kutya oshigwana shoka osha kala uulenethimbo inashi mona omeya na oya gandja omunino ngoka kaakwashigwana onkene itaya vulu okukutha mo omeya ya tule momagumbo gawo molwaashoka omunino omushona. Okwa tsikile kutya oye na okutegelelwa pu monike iiyemo opo ku vule okugandjwa omunino ngoka tagu vuul okukuuthwa omeya koshigwana.

Ismael Hambudi, ngoka e li omukomeho gwOhangwena rural water supply directorate, okwa popi kutya Pohamba okwa li a kunkililwa nokutseyithilwa kutya omunino ngoka omushona na itagu vulu okulongithwa kaakwashigwana ya kuthe mo woo omeya, ihe okwa kondjitha opo omunino gu longwe.

Pohamba okwa popi kutya omunino ngoka ogwa yonuka pomahala gamwe noshinima shoka osha lopotwa ihe inaya mona omayamukulo. Okwa popi kutya aanambelewa mboka haya pangele oya kala aluhe nokugandja omatompelo gompumbwe yiiyenditho niilongitho.

Kansela okwa tsikile kutya omeya momunino ngoka pokati komukunda Okanghudi sigo Omanunama oga pata omolwa omunino ngoka gwa yonuka pokati mpoka.

Hambudi okwa tindi omapopyo gaPohamba ta popi kutya ke na ontseyo ndjoka yomunino ngoka tagu pumbwa okupangelwa.

Okwa zimine kutya iihauto yiikondo yimwe oyi li monkalo yanayipala. Kombinga yoolopota ndhoka dha ningwa okwa popi kutya otaka tala moshinima shoka.



KENYA KAMBOWE