Omamonitho giihuna okuza kopolisi taga londo pombanda - NamRights

CATHERINE SASMAN



Ehangano lyuuthemba womuntu moNamibia, NamRights, olya popi kutya omapopyo gomahepeko taga ningilwa aaakwashigwana kaanambelewa yopolisi otaga londo pombanda noonkondo.

Omukomeho gwehangano ndyoka lyoNamRights, Phil ya Nangoloh, okwa popi kutya ehangano lyawo oli na omatompelo okwiitaala kutya aakwashigwana kaye li we megameno uuna ye li moondjeedhililo dhopolisi.



NamRights okwa popi woo iikwatelela kiipotha ine mbyoka ya holoka iiwike iyali ya piti.



Momasiku 12 gaKotomba, Zakonenua Ndiaombe okwa hulithile mendiki lyuunamiti moTsumeb omanga a li metonatelo lyopolisi.



Ndiaombe okwa li atulwa pamwe miipandeko naafakelwa yalwe yatatu moshipotha shuukongo waaheli paveta, oshinano shookilometa dhontumba muumbugantu womweelo gwaShivelo.



NamRights okwa popi kutya oonakutulwa miipandeko mboka oya tindilwa uunamiti nonando oya li yeehamekwa kopolisi pethimbo ya tulwa miipandeko.



Ndiaombe okwa li a falwa koshipangelo momasiku 12 gomwedhi nguka, konima shoNamRights iidhopomo ihe okwa li kwa lata.



NamRights natango okwa popi kutya okanona kokakadhona koomvula 15 hoka ke na uupyakadhi wopamadhilaadhilo, oka li ka kwatwa onkonga komunambelewa gwopolisi mondunda yokulala yomupolisi mosasiyona yopolisi pOshikango.

Okakadhona hoka okali ka falwa kopolisi konima sho ka kwatwa onkonga kuhekulu.

Omunambelewa gwopolisi ngoka ta fekelwa okwa tulwa miipandeko nokupangula. Okwa tindilwa omboloha konima sho a holoka mompangu.

Moshipotha shimwe natango omukwashigwana gwaAngola omulumentu okwa dhengwa sigo omeso komunambelewa gwopolisi a tseyika nedhina 'Shorty' nenge 'Shaanika'.

Omukwashigwana ngoka gwaAngola okwa li ta landitha omahooli shaaheli paveta poongamba dhiilongo mbika iyali. Omunambelewa gwopolisi okwa tulwa miipandeko na ota tamanekelwa oshipotha shedhipago na okwa tindilwa omboloha pethimbo a holoka komeho yompangu.





Natango Ishmael Benyamen, okwa popiwa a kwatwa onkonga kelombwelo lyomupolisi omanga a li mondjeedhililo yaVenduka, sha landula etulo miipandeko lye sho a tindi okutulwa miipandeko omolwa etaaguluko lyompango yomoondjila.

Oshiningwanima shoka osha ningwa momasiku 28 gaSepetemba notashi konaakonwa.

Opolisi yaNamiba oya koleke iipotha mbyoka na oya popi kutya otayi konaakonwa noonakulonga iimbuluma mbyoka otaya ka taalela oshilanduli.





Moshipotha shaNdiaombe, omupopiliko gwopolisi, Chief Inspector Kauna Shikwambi okwa popi kutya otaku ka ningwa omakonaakono goshiyetithi sheso opo ku monike kutya oshike sha etitha eso lye.



Shikwambi okwa popi kutya omufekelwa moshipotha shekwatonkonga kokakadhona koomvula 17 na kashi shi 15 ngaashi sha lopotwa, okwa tulwa miipandeko na okwa holoka nale mompangu yaHangwena momasiku 12 gomedhi nguka, na okwa tindilwa omboloha. Otaka holoka natango mompangu momasiku 26 gaNovemba.



Shikwambi okwa popi kutya opolisi oyi na ontseyo kombinga yoshipotha shekwatonkonga lya ningilwa mondjeedhililo yopolisi yaVenduka, na okwa patululwa oshipotha shomuyonena noshikondo shogender-based violence protection moKatutura.



Okwa popi kutya otaku ningwa omakonaaakono.

Omanga ta koleke nokuzimina iipotha mbyoka, Shikwambi okwa popi kutya aapolisi nayo aantu, na ohaya vulu okuninga omapuko gopauntu.

Okwa gwedha po kutya aapolisi oyiitulamo mokukwathela oshigwana nokukalekapo ombinga nelandulathano, nomukomeho gwopolisi aluhe oha pula ku ningwe omakonaakono gomeni uuna aapolisi yiihumbata nayi.