Okansela moRundu taya ka konga ekwatho kompangu

Swapo okwa tokola okukutha miilonga ookansela ye yatatu moRundu, mwakwatelwa mayola omupe ngoka opo a hogololwa, Isack Kandingu, shoka ya tindi okwiiyutha kelombwelo kutya elelo lyondoolopa ndjoka inali lundululwa.

Yamwe mboka ya kuthwa miilonga omupeha mayola gwondoolopa ndjoka, Toini Hausiku, ngoka e li omukulukadhi gwomupeha amushanga gwoSwapo, Marco Hausiku oshowo Anastacia Shinduvi-Foya. Mboka yatatu oya popi mEtitatu kutya oya tokola okukakonga ekwatho kompangu omolwa ekutho lyawo miilonga.

Oya lombwele oNamibian Sun kutya oya ninga nale ekwatathano naakalelipo yawo yopaveta.

“Otwa yakula ombaapila okuza kongundu na otatu fala oshikumungu shoka kompangu. Otwa pewa omayele kaakalelipo yetu yopaveta opo katu tye sha oshindji kombinga yoshikumungu shika, molwaashoka otashi vulu okuya moshipala oshipotha shetu.”

Pambaapila ndjoka ya shangwa momasiku 12 gaFebruali na oya shainwa kuShaningwa, mboka oya kuthwa kiilonga molwaashoka oya dhini nokwaaha landula omalombwelo gongundu mEtine lya piti, pethimbo lyomahogololo gelelo lyondoolopa yaRundu ngoka ga ningwa Etine lyoshiwike sha piti.

Shaningwa okwa li a gandja elombwelo opo Verna Sinimbo a kale mayola gwondoolopa nomupeha gwe ta kala Ralph Ihemba.

Natango momukanda ngoka a shangele omukwatakanithi gwoSwapo moshitopolwa shaKavango East, Ottilie Shinduvi , Shaningwa okwa popi kutya okwa holola kutya ongundu oyuuvithwa nayi kutya ookansela mboka yatatu inaya dhina owala elombwelo lye ihe oya ulike nokuhogolola kansela gwongundu yompilameno opo a kale oshilyo shokomitiye yelelo lyondoolopa.

Shaningwa okwa popi kutya, Johanna Kakondo, Ngondo Johannes oshowo Sarafina Kandere otaya pingenepo ookansela mboka ya kuthwa miilonga,nombaapila inayi holola kutya eganithilo lyawo miilonga otali ningwa uunake.

Lwopokati mpoka aakalimo yomoRundu mboka ya popi noshifokundaneki shoNamibian Sun inaya hala uukwatya wawo wu tumbulwe, oya pula kutya omolwashike Swapo ina kutha miilonga ookansela ayehe yatano yelelo ndyoka.

Oya popi kutya muNovemba gwomvula yo 2018, ookansela ayehe yahamano yelelo lyondoolopa yaShakati oya kuthwa miilonga konima sho ya tindi okutula miilonga elombwelo lyongundu , na oya hogolola Katrina Shimbulu onga omunashipundi gwokomitiye yelelo pehala lya Onesmus Shilunga.

“Shika okatongo taka ningilwa aantu yomoKavango. Sho sha ningwa mOshakati aantu ayehe oya kuthwa miilonga nokuningilwa omutumba gwomautho ihe moRundu omwa kuthwa owala aantu yatatu na oya pingenwa po inaku ningwa omutumba gwomautho. Swapo oku na omilandu ndhoka hadhi landula ngele tashi ya kiikumungu yi li ngaaka.”

Sho a ningilwa omapulo, Shaningwa okwa tindi okuyamukula.

Oshiwike sha piti, hahende Silas-Kishi Shakumu okwa lombwele oNamibian Sun kutya oongundu dhopolotika kadhi na oonkondo okuthiminika ookanselayomalelo goondoolopa ya kale ngaashi yakala nenge ya lunduluke uuna tashi ya komahogololo gaaleli yoondoolopa.



Iiyandwa

Oshiwike sha piti, Kandingu okwa hogololwa onga mayola gwaRundu na okwa pingenepo Sinimbo, omanga Hausiku hogololwa onga omupeha mayola na okwa pingenepo Ihemba.

Shinduvi-Foya oshowo Matheus Wakudumo ayehe ya za kongundu yoAll People's Party (APP) oya hogololwa onga iilyo yokomitiye yelelo lyongundu, omanga oshilyo oshititatu shelelo sha li natango tashi ka hogololwa.

Sinimbo, Ihemba naReginald Ndara oya li ye na okukala iilyo ya gwedhwa po yelelo lyondoolopa, omanga Shaningwa ina shanga omukanda ngoka gwa kuthwa miilonga aahogololwa.

Shaningwa okwa gandja omalombwelo muNovemba gwomvula ya piti, kutya naku ningwe omalunduluko mOkahandja opo mayola gwaKahandja, Johannes 'Congo' Hindjou a kuthwe oshinakugwanithwa shoka nokuningwa oshilyo shelelo lyondoolopa omanga inaku ningwa omalunduluko gasha moRundu.

Eganithilo miilonga lyookansela mboka olya li lya pumbwa okuningwa omanga omasiku ga 7 gaFebruali inaga thika, palombwelo ndyoka lya li lya zi kmbelewa yamushanga gwoSwapo.

Ondoolopa yaRundu oyo owala ya pula komeho nomahogololo ngoka oshiwike sha piti omanga moKahandja omahogololo ga kala taga undululwa komeho molwaashoka kape na mangestrata.

moRundu oshiwike sha piti, mangestrata Sonia Sampofu okwa pula okafudhepo kuule woominute ntano konima sho Sinimbo ina mona omawi momahogololo gamayola, naashoka osha halutha oonakukala momahogololo ngoka. Kandingu okwa ulikwa nokuhogololwa a kale mayola na okwa zimine.

Sinimbo okwa li uulikwa a ninge omupeha gwe ihe okwa tindi, na okwa ulikwa nduno Hausiku, ngoka a zimine.

Shinduvi-Foya okwa hogololwa onga oshilyo shotango shokomitiye yelelo na okwa zimine.

Ponkatu ndjoka osha ulike kutya Sinimbo naIhemba kaya li ye na ohokwe okukutha ombinga omahogololo onkene Wakadumo okwa hogololwa a ninge oshilyo shokomitiye yelelo.

Konima aahogololwa oya ganithilwa miilonga omanga aakwashigwana yamwe ya thigipo ehala na oya kala pondje taya imbi omaimbilo gekondjelomanguluko. Iilyo yimwe yoSwapo oya ningile ookansela omatilitho, nokuyadhimbulukitha kutya inaya dhana noSwapo.