Ohangwena ya yamukula komanyenyeto goPDM

Oshitopolwa shaHangwena osha yelitha kutya otashi ka gandja oolopota adhihe dhelongitho lyiimaliwa moshitopolwa shoka dhuule woomvula ne dha piti, okuya momwedhi omutimugoyi nuumvo.

Elelo lyoshitopolwa shaHangwena olya popi kutya otali ka gandja ondokumende dhalyo adhihe dhelongitho lyiimaliwa komunambelewa omuyalulimambo gopashimaliwa gwepangelo, nuumvo nokuhulitha po onkalo yokukala inayi gandja oolopota ndhoka. Omunambelewa gwOhangwena chief regional officer (CRO) Fillipus Shilongo naye okwa pula ongundu yoPopular Democratic Movement (PDM) yi lopote omalimbililo gawo kOkomisi yoAnti-Corruption Commission (ACC) ngele oyi wete kutya iimaliwa yoshigwana ya longithwa pambambo koshitopolwa shoka.

Shoka osha landula omapopyo ga ningwa komunambelewa omukwatakanithi gwongundu yoPDM moshitopolwa shaHangwena, Hidipo Hamata ngoka a lundile oshitopolwa kutya otashi longitha pambapo iimaliwa yoshigwana na itashi gandja oolopota dhelongitho lyiiyemo. Okwa pula woo epangelo li ningile elelo ndyoka omakonaakono. Hamata okwa popi kutya ongundu yoPDM oyi wete kutya sho elelo lyoshitopolwa shoka inali gandja oolopota dhelongitho lyiiyemo yawo komunambelewa omuyalulimambo otashi ulike kutya ope na uulingilingi tawu longwa melelo ndyoka oshowo elongitho pambambo lyiiyemo, naashoka itashi idhidhimikilwa kongundu yawo. Okwa popi kutya otaya pula epangelo li ninge omakonaakono kutya omolwashike elelo lyoshitopolwa shoka inali gandja oolopota dhawo dhelongitho lyiimaliwa.

Hamata okwa popi natango kutya oshipopiwa shoshitopolwa shoka sha tseyithwa omasiku ga piti kungoloneya gwoshitopolwa shoka, Usko Nghaamwa's kashi na shoka tashi ti ngele natango ngoloneya ita vulu okuyamukula kutya iimaliwa yoomiliyona 68.2 mbyoka ya longithwa momumvo gwoshimaliwa gwomvula yo 2012/13 oya longithwa shike. Shilongo okwa popi kutya otaya kwatelwa komeho kontopolwa 38 oshowo 39 yOmpango yOmalelo gOondooopa yomo 1992, ndjoka ya lundululwa na otayi ya pula opo ya gandje oolopota dhelongitho lyiimaliwa yawo komuyalulimambo gwepangelo. Shilongo sho a tameke iilonga ye muMaalitsa onga omunambelewa gwoCRO mOhangwena okwa uvaneke kutya oshinima shoka taka tala tango, oolopota dhelongitho lyiimaliwa ndhoka inadhi gandjwa natango. Okwa popi kutya Ohangwena oyi na oolopota dhi li konima noomvula dha thika pu ne. Okwa popi kutya oshitopolwa osha ndopa okugwanitha po ontopolwa ndjoka tayi pula opo ku gandjwe oolopota ndhoka ihe okwa popi kutya oshikumungu shoka otashi ungaungiwa nasho, noolopota ndhoka otadhi kala dha gandjwa muSepetemba. Shilongo okwa kwashilipaleke ongundu yoPDM kutya oye na uyelele awuhe kombinga yelongitho lyiimaliwa mbyoka na otaya ka gandja oolopota ndhoka mbala ngaashi ya yi metsokumwe nombelewa yomuyalulimambo gwepangelo.

Kombinga yoomiliyona 68.2, Shilongo okwa yelitha kutya omwaalu ngoka okwa holoka po omolwa uupyakadhi wopautekiika, nomwaalu ngoka kagu li mondjila, nuupyakadhi mboka owa kandulwa po ngashiingeyi.

“Shoka sha simana, ongundu yoPDM oshowo kehe gumwe na ya tseye kutya oombelewa dhepangeo moka mwa kwatelwa iiputudhilo yiikondo ya yooloka oshowo oombelewa dhiitopolwa otaya kwatelwa komeho kompango ngele tashi ya kiimaliwa yoshigwana.”

KENYA KAMBOWE