MUN a gandja ombili

Ehangano lyo Mineworkers Union of Namibia (MUN) olya gandja ombili komina yaaIsrael ndjoka tayi adhika konyala omukakena gwookilometa 100, okuza mondoolopa yaKahandja. Omupresidende gwoMUN Ismael Kasatu, okwa gandja ombili komina yaPurity Manganese omolwa oshiningwanima shoka sha holoka momasiku 14 gaApilili sho aaleli yehangano ndyoka yali taya taalele po nokutala konkalo yaaniilonga moshitopolwa shaTjozondjupa nopethimbo lyetalelepo ndyoka, ngoka a li ta longo pehala lyAmushanga-Ndjai Ebben Zarondo, okwa ula niitya iiwinayi elelo lyehangano lyomina ndjoka. “Ota tu gandja nena mpaka ombili omolwa omapuko ngoka twa ningile aaniipambuliko yomina yoPurity Manganese, aakomeho oshowo aaniilonga yomina ndjoka,” Kasatu tati. Kasatu okwa gandja woo ombili kehangano ndyoka omolwa oshiningwanima shoka sha holoka momasiku ga7 gaMei moka aaniilonga nale yehangano ndyoka ya ningi ehololomadhilaadhilo lyopambili ye li ompinge nekateko lyoshizemo shompangu omolwa oshikumungu shawo shetidho miilonga. Pahapu dhaKasatu pethimbo lyehololomadhilaadhilo ndyoka, iilyo yimwepo younion yawo oya longitha omityo omiwinayi. Omina yaPurity Manganese oya tidha miilonga aaniilonga ya thika pe-156, sha landula enkanka ndyoka ya ningi muJuli gwo-2009. Aaniilonga mboka oya monika ondjo omolwa ekuthombinga menkanka lyaali pampango, oku kwata ko koonkondo omaliko gehangano, oku faula kiilonga, okuya mehala lyehangano koonkondo oshowo oku ningila omatilitho nokuya moshipala aaniilonga mboka yakala taya yi kiilonga. Enkanka ndyoka okwa lopotwa lya etithwa kolugodhi ndoka lwali lwa tukuka pokati kaaniilonga yaali momina ndjoka. Gumwe gwomaaniilonga, Yuri Pressman okwa lopotwa a kambadhala oku kutha ongodhi komukalelipo gwaaniilonga Walter Nguvitjita. Otaku popiwa kutya ongodhi ndjoka oyali ya pumbiwa omolwa iilonga. Konima yolugodhi Nguvitjita oye owala a kuthwa miilonga pakathimbo naashoka osha etitha iilyo yoMUN yi ye moshipala iilonga momina. Nguvitjita okwali a shunwa miilonga ihe okwa lopotwa a li a tindi oku gandja olopota kaakonaakoni yiilonga sha etitha natango a kuthwe miilonga. Konima yaashoka aaniilonga oya yi menkanka lyaali paveta sigo ya kuthwa miilonga muAguste gwo-2009. Oshikumungu shoka osha falwa kuKomufala gwAaniilonga netokolo lya ningwa olyali muuwanawa waaniilonga ihe omina oya tindi etokolo ndyoka.