Joyce Meyer a talele po Namibia

Omuuvithi gwaAmerika na oku li omushangimambo Joyce Meyer okwa nyana nomuthindo omwaalu gwoondunda dhomalovu ndhoka tadhi adhika mEpandanda lyaEvelyn mOvenduka. Meyer okwa pula woo aakiintu mboka yeli momakwatahano gopahole ihe otaya mono iihuna opo ya dhigepo omakwatathano ngoka. Meyer okwa popi ngaaka pOkapale kEmanguluko (Independence Stadium) mOvenduka mEtitano nOlyomakaya ga piti, mpoka pwa gongala engathithi lyaaNamibia oyendji. Metitano Meyer okwa lombwele mboka ya gongala pokapale kutya okwa talele po Epandanda lyaEvelyn oshiwike sha piti, ihe okwa kumwa noonkondo komwaalu gwoondunda dhomanwino ndhoka tadhi adhika mepandanda ndyoka. Meyer okwati, onkalo ndjoka kayi shi ombwaanawa nAanamibia oya pumbwa omukalo gumwe gwokwiinyanyudha dhi vulithe okunwa omalovu. Meyer okwa hokolola woo ondjokonona ye nkene a kala ta monithwa iihuna nomiyonena dhopaihulo omanga a li okanona na okwa kunkilile mboka taya iyadha momakwatahano ihe otaya monithwa iihuna opo ya dhige po omakwatahano ngoka. Okwa pula aantu ya tameke okutaambako oshizemo shomapuko gawo ta ti, aantu oyendji ohaya kala taya ipopile nokugandja uusama kaantu yalwe omolwa omaihumbato gawo omawinayi. Okwa gandja oshiholelwa shomumwayinamati ngoka a kala a pikwa kiingangamithi nahugunina okwa hulitha po onkalamwenyo ye sho iidhipaga, okwati mumwayina kali e na he ngoka ta vulu okugandja oshiholelwa oshiwananwa kuye onkene okwa wayimine etanga lyegameno sigo a tameke okulongitha iingangamithi. Meyer okwati, nonando aantu oyendji oya kambadhala okugandja ekwatho kumumwayina inaya vula okupondola sha molwaashoka yemwene kali ta vulu okwiikwathela. Omuuvithi ngoka okwa popi woo kombinga yedhiminathano po ta ti, itashi kwatha sha okukala aantu ya kwatelathana oonkone. “Owa pumbwa okudhimina po mboka ye ku ningi nayi opo owala to aluka,” Meyer ta ti. Ongundu yaSouth Afrika yedhina Hillsong oya kwatele woo komeho engadhidhi lyaantu mboka ya gongala pokapale mokutanga nokusimaneka Kalunga. OVENDUKA GORDON JOSEPH