Iihuna molukanda lwaHavana

Otaku konaakonwa oshipotha shokwaahasila oshisho aanona, konima sho okanona koomwedhi ndatu ka hulitha kondjala nenota konima owala yoowili sho okanona hoka pamwe nuumwayina uutatu wa kuthwa mo mombashu koowili dhokongulohi yEtitano moka yali ya thigwa kuyina.

Shoka osha lopotwa mOhavana moshilandopangelo.

Uunona uutatu, uumati woomvula ntano oshowo omvula yimwe nokakadhona koomvula dhi li pokati kandatu nane, owuli kohi yetonatelo lyoshipangelo shaKatutura.

“Kaya li ye na oonkondo, oya li ya loloka na oya sa enota. Kapwa li ngoka ta yamukula. Sho twa sukula omakumbatha otwa mono okanona. Inaka zalekwa, okali owala ka sikilwa nelapi,” Omundohotola Aina Katangolo a hokolola konima ya thiki polukanda lwaHavana. Nonando omakonaakono goshiyetithi sheso oga pumbwa okuningwa, Omundohotola Katangolo motseyo ye ndjoka e na, ota konenene kutya okanona oka hulitha sha etithwa kenota oshowo ondjala. Yina yiinona mboka ina pangulwa natango pauyelele wa gandjwa komunambelewa gwopolisi. Omunambelewa gwonzulonkalo otaka tula mo oshipotha pehala lyepangelo oshiwike shika.

Yina yuunona mboka okwa monika nokutulwa miipandeko sha ningilwa popepi nombashu ye ihe omunambelewa gwonzulonkalo okwa gandja omayele opo a falwe koshipangelo a ka kale nuunona na otaka tulululwa ishewe miipandeko ngele kwa tulwa mo oshipotha.

Omunambelewa omupopiliko gwOpilisi yaVenduka, Fabian Amukwelele okwa koleke kutya omukiintu ngoka sho a monika okwa fudhililwa mo okwa adhika nondjele yolakoholi molutu, yi li po 0.80.

Aashiinda oya lombwele opolisi kutya yina yuunona mboka aluhe ohe wu thigi megumbo omanga tayi a ka nwe omalovu. Uunona mboka owa monika konima sho kwa dhengwa ongodhi komuntu ngoka iniiholola, ya dhengelwa koprograma yo Copps koradio yoKosmos 94.1 lwopotundi onti 20:00 mEtitano.

Sho opolisi ya teya po omweelo, uunona owa adhika wa lala pokatalashe okashona mombashu yondunda yimwe, wa fa wa kotha.

Omundohotola Katangolo opamwe nomutoolinkundana, Francois Lottering, ngoka a li oshitopolwa shongundu yoCopps, oya popi kutya uunona mboka ka wa li tawu yamukula, na otashi ulike kutya owa igilila onkalo ndjoka.

Omakonaakono guunamiti ga ningwa meendelelo kOmundohotola ngoka oga holola kutya uunona owa ulike omadhidhiliko gomanyutu, enota oshowo okwaa hasilwa oshisho, ihe okanona hoka okashona okali monkalo ombwiinayi.

Omolwa onkalo ongundu ndjoka oya tokola kutya itaya vulu okutegelela oambulansa nOmundohotola Katangolo pamwe nanona oya falwa koshipangelo shaKatutura, nonando okwa ningwa onkambadhala, ohanana ndjoka oya hulitha koongulasha dhOlyomakaya.

Amukwelele gwOpolisi yOshilando okwa popi kutya opolisi natango oyali ya ithanwa koshinima sha faathana mOlyomakaya, moka aanona yane ya hupitha natango mombashu moka ya adhika ya patelwa.

Aanona mboka oya li ya sa ondjala na oya loloka kokulila, naakuluntu yawo inaya monika.

Aanona mboka yoomvula 1, 4, 7 oshowo 10, oya pewa hekulu momudhingoloko gwaGroot Aub konima sho opolisi ye ya pe iikulya.

Amukwelele okwa pula oshigwana shi lopote iipotha yokwaasila oshisho uunona nenge emonitho lyiihuna uunona.

Omunambelewa gwopolisi ngoka a li po poshiningwanima shomEtitano okwa popi kutya iipotha yokwaahasila oshisho aanona otayi londo pombanda na okwa pula oshigwana opo aluhe shi ye mekwatathano nopolisi nokulopota iipotha mbyoka.

JANA-MARI SMITH