Hage a kuutumba niikundaneki

Pethimbo lyomutumba gwiikundaneki ngoka a ningi, konima sho a galuka molweendo lwe lyokoUnited States, omuleli okwa popi kutya elelo lye inali hala oshilongo shika kale itashi vulu okulelwa. Okwa popi kutya aanona aayehe moshilongo otaya talwako sha faathana, ihe okwa popi kutya omaihumbato gaanona mboka ya valelwa kombanga oga li taga vulu okutula moshiponga oshilongo.

“Otaya kondeke oondjila nokuponokela oofaalama dhaantu. Inatu hala oshilongo shi kale itashi vulu okupangelwa. Otwa tokola okuya pa omadheulo opo tu ya pe iilonga, mboka ya tsu kumwe netokolo ndyoka otaya ka longitha iimaliwa mbyoka,” Geingob a popi.

Aanona mboka ya valelwa mekondjelomanguluko oya kala nokuninga omahololomadhilaadhilo oomwedhi dha piti, taya pula iilonga okuza kepangelo. Omwedhi gwa piti, okabinete okwa tokola opo aanona mboka ya ka pewe omadheulo moshiputudhilo shopaungomba shaBerg Aukas, Omupresidende okwa ekelehi omapopyo kutya okwa kutha iimaliwa piimaliwa mbyoka ya nuninwa aanona mboka opo e ke yi longithe mwene molweendo lwe lwokoUSA.

Okwa nyana woo iikundaneki sho tayi pula opo a tseyithe ondjambi ye moshigwana.

Sho a pulwa kombinga yekanka lyaalongiskola ndyoka kwa tegelelwa li tameke, okwa yamukua kutya shoka kashi shi oshinakugwanithwe she.

“Kombinga yaalongi otu na omilandu. Ihaya yi moonkundathana nomupresidende ihe otaya vulu okuya moonkundathana namushanga gwOkabinete.”

“Inaya adha etsokumwe na oya tokola okuya mekanka. Ngame ngashiingeyi otandi yi mo tandi popi shike? Ndi tye nee aawo inamu ya mekanka nenge eeno indeni mekanka? Ngame omulongiskola nale ngame mwene. Aalongi oye na oshinakugwanithwa shaanona, onda hala okupopya noNantu – haku ya moonkundathana nayo molwaashoka shoka osha pata nale. Onda yi le momutumba noAffirmative Repositioning (AR), onkene ngame aluhe onda pyakudhukwa okuya momutumba nakehe. Ope na AaNamibia mboka ihaya mono iiyemo yasha, otatu ya kwathele ngiini? Itatu ya ekelehi molwaashoka omakonaakono ogeli popepi,” Geingob ta ti.

Omapopyo ga Geingob okwe ga ningi pethimbo mpoka aalongi taya yalula omasiku opo ya ye mekanka. Aalongi oya hogolola okuya mekanka sho ehangano lyawo nepangelo ya ndopa okwaadha etsokumwe megwehelo lyoondjambi. Aalongi otaya pula oopresenda 8 omanga epangelo tali ya gwedhele owala noopresend 5.

Pethimbo noonkundathana dhoka a ningwa nadho koVoice of America koprograma yo ‘Straight Talk Africa’, Geingob okwa popi kutya epangelo lye otali ka ninga omayalulo nokutala kutya otaku kandulwa po ngiini uulingilingi nokuyambulwa po uuyuki moshilongo.

Nonando ongaaka pethimbo lyomutumba gwiikundaneki ngoka gwa ningwa, Geingob okwa popyulula kutya omakonaakono ngoka otaga ka ningwa monakuyiwa.

NEEEF otayi kalele

Geingob, ngoka a lombwele iikundaneki yopaigwana kutya ondhungedhilaadhilo yoNew Equitable Economic Empowerment Draft Bill (NEEEF) oyi li edhilaadhilo ewinayi na itayi ka ningwa, ngashiingeyi okwa popi kutya ontotwaveta ndjoka otayi ka kandula po oluhepo moshilongo.

Okwa popi kutya mboka ye wete kutya oontopolwa dhilwe mondungedhilaadhilo ndjoka odha puka, ngaashi kutya otashi ka tidhila kokule aapunguli, okwa popi kutya naya gandje omadhilaadhilo ngoka ye wete ge li mondjila, ihe ontotwaveta ndjoka otayi kalelele.

Okwa gandja omaiyuvo ga thika pe-120 kombinga yontotwaveta ndjoka pethimbo lyiigongi ya ningwa okukundathana ontotwaveta ndjoka pokati kaJuli naAguste. Sho ya ningi omapulaapulo ngele ontotwaveta ndjoka otayi endele pamwe nekotampango, aanangeshefa aatiligane moshilongo oye wete kutya ontotwaveta ndjoka otayi ka etitha etotepo lelyatelo pevi lyaantu yamwe.

JEMIMA BEUKES