Etheni ndimaneko oshikakothimbo shandje - Geingob

Presidende Hage Geingob okwa popi kutya ondungethaneko yoHarambee Prosperity Plan oya nyanwa koyendji omanga nokuli inayi ya miilonga.

Sho a popitha engathithi enene lyaakwashigwana mboka ya kala poshigongi shoSwapo shoka sha ningilwa moKaiti mOlyomakaya, Geingob okwa nyana nomuthindo aantu mboka iithana kutya 'aanapolotika yandopa' mboka ya wayimine omahangano gopashigwana opo ya vule okunyana nokugandja uusama kepangelo.

“Ahowe, omwa sindika,” Geingob ta ti, na okwa gwedha po kutya omahangano gopashigwana moshilongo oga hala nokuungaunga nakehe shimwe, shoka epangelo li na oshinakugwanithwa shokuninga, na inaga fa omahangano gopashigwana muuyuni ngoka ge na iinakugwanithwa yontumba.

“Mboka aanapolotika ya ndopa, na ohaya hala okuya mo okupitila komweelo gwokonima. Omahangano gopashigwana oga hala okuyamo?Omolwashike hatu ningi omahogololo nduno?”

Geingob okwa tsikile kutya itaku pitikwa kehe gumwe a lele oshilongo molwashoka mboka taya lele oshilongo oya hogololwa nokupewa oshinakugwanithwa shoka.

Okwa ningi oshiholelwa shehwahwameko lyoLandless People's Movement (LPM) nelelo lyehwahwameko ndyoka moka mwa kwatelwa omupevi minista nale gwOmavi nOmatulululo, Bernadus Swartbooi, niilyo yoSwapo yimwe po mbyoka tayi ya mbidhidha oshikumungu shegandjo kaakwashigwana evi lyawo lyuuthiga.

Geingob okwa li ta popi poshigongi shoka sha ningilwa pokapale ka J. Stephanus Stadium moTseiblaagte mpoka ehwahwameko lyoLPM lya ningile oshigongi shawo omwedhi gwa popi, shoka sha nana engungo enene lyaakwashigwana.

Geingob okwa popi kutya aakwashigwana mondoolopa ndjoka unene yomuhoko gwAaNama mboka ya li ya kala poshigongi shoka sha ningwa koLPM oya lombwelwa opo kaya kale poshigongi shoka shoSwapo.

“Omwa lombwelwa kutya inamu ya koshigongi molwaashoka ka mu na evi, ngashiingeyi inaamu hala okuhakela omake.”

Okwa popi kutya Swapo haye a kutha ko evi lyaakwashigwana ihe epangelo lyaGermany oshowo epangelo lyaSouth Afrika.

“Swapo okwa kutha po evi lyeni? Omolwashike Swapo e na okuningila ngaaka? Swapo okwiigandjela oshindji; oyendji oya sila ekondjelomanguluko lyoshilongo shika, opo mu mone evi lyeni. Omolwashike aaleli yaSwapo inaya hala mu mone evi?” Geingob a pula.

Presidende Geingob natango okwa popi kombinga yiikundaneki mbyoka aniwa ya hala okwiidhopa melelo lyepangelo, sha landula sho ya mono kutya aanapolotika yompilameno kaye na oonkondo. Nonando ongaaka okwa popi kutya ota popile emanguluko lyiikundaneki ndyoka lya tulwa po kuSwapo.

Okwa tsikile kutya ke na ko nasha nomanyano nomausama ngoka ta ningilwa komudhindi gwoshifokundaneki nale shoThe Namibian , Gwen Lister, molwaashoka okwa dhana oshitopolwa she mekondjelomanguluko lyoshilongo.

Okwa popi kutya shoka shimuuvitithe nayi aaatoolinkundana yoomvula o-40 okuya po-50, mboka yali ye na okukala aakondjelimanguluko yaNamibiaa ihe kaya li aakondjelimanguluko ihe ngashiingeyi otaya iningitha ya fa aahwahwameki yuundemokoli,

“Oya li peni nale? Gwen ota vulu okupopya shoka a hala molwaashoka okwa kutha ombinga mekondjelomanguluko lyaNamibia, ihe ongiini mbela kombinga ya yalwe? Oya li koLondon nomahala gamwe ga yooloka, ihe ngashiingeyi oya hala yetu longe uundemokoli. Otandi ti ahowe!” Geingob a popi nomuthindo.

Okwa ulike omunwe oshikundnaeki shaNBC, shoka aniwa tashi lopotwa kombinga yonkalo yoluhepo moshilongo na osha e ta ethano kutya ondungethaneko ye yoHarambee Prosperity Plan oya ndopa omanga nokuli inayi tameka iilonga yawo.

“Kehe ongulohi kotiivi otaya ulike owala oombashu, tse inatu totapo oombashu ndhoka odha kalapo nale,” Geingob ta ti.

Geingob okwa popi kutya oluhepo ndoka lu li mokati koshigwana olwa za nale, nepangelo halyo tali pewa ombedhi ihe naku gandjwe ombedhi komapangelo guukoloni.

Omuleli okwa popi woo kombinga yuulingilingi.

“Kutya ngoye omukwaSwapo nenge ogwongundu yimwe ninga ongeshefa yoye pauyuuki. Inokala kala wu na efupa opo wu ninge omukengeli mesiku limwe. Otatu yambidhidha iilyo yoSwapo yi ninge oongeshefa ihe nadhi kale tadhi ningwa pauyuuki ihe haku pitila muulingilingi nomokwiipula kutya molwaashoka ngoye ogwoSwapo nena Swapo epangelo lyoye nakehe shimwe shi pewa. Aawoo! Namibia limwe, Oshigwana shimwe.”

Okwa dhenge woo omuthindo kutya epangelo kali li ompinge naanangsehfa ngaashi tashi popiwa.

Okwa tsikile kutya epangelo lyoSwapo olya tula miilonga omilandu dhopapangelo omiwanawa opo dhi gandje omauwanawa koshigwana.

Okwa popi kutya epangelo lyoSwapo oya dhidhilike kutya oshilongo osha talela ompumbwe yoshimaliwa, ihe otali tula miilonga oonkatu dhoka dha nuninwa okuhwepopaleka onkalo ndjoka, ta gwedha po ta ti, Ominista yEmona Calle Schlettwein oya holola kutya oshilongo oshi li mondjila yokuza mo momathimbo ngoka omadhigu.





CATHERINE SASMAN