Ekondjelo lyoonkondo - Kanime

Omukomeho gwopolisi yoshilando shaVenduka, Abraham Kanime okwa popi kutya ekutho lye miilonga olya etithwa kekondjelo lyoonkondo kutya opolisi yoshilando nayi longe ngiini, na okwa uvaneke kutya otaka shunitha ekondjo ndyoka.

Ekondjelo lyoonkondo dhoka pokati kOmunambelewa Omukuluntu gwElelo lyoshilando shaVenduka, Robert Kahimise oshowo Kanime olye ya polweela omutenya gwOmaandaha shoKanime a kuthwa miilonga.

Kanime ngoka a kala omukomeho gwopolisi yoshilando uule woomvula 16 na okwa kuthwa miilonga omolwa aniwa okulongitha iimaliwa yoshigwana pwaahena epitiko.

Shoka osha hololwa pamakonaakono gopaufupi ngoka ga ningwa, ihe omakonaakono gomuule natango oga pumbwa okumanithwa. Ekutho miilonga lyaKanime olya ningwa, sha landula sho a kongo ekwatho kOmpangu yoPombanda omvula ya piti, sha landula sho yiipumu mumwe naKahimise ngoka a tameke iilonga ye melelo lyoshilando shoka omvula ya piti. Kanime okwa popi kutya nonando okwa yakula omukanda gwe gwekutho miilonga ina tseyithilwa kutya ota kuthwa miilonga kwiikwatelelwa kiipotha yi li ngiini. Okwa popi kutya ngele okwa tseyithilwa iipotha mbyoka ta tamanekelwa nena otaka ka ya mekwatathano nomukalelipo gwe gwopaveta. “Sha landula omakonaakono gomeni, ondi na omatompelo opo ndi itaale kutya owa ya pondje ompango onga Omukomeho gwOpolisi yOshilando,” omukanda ngoka gwa shangwa kuKahimise gwa holola. Kahimise okwa popi kutya okwa kutha Kanime miilonga sha landula kutya omakonaakono ngoka ga ningwa meni otaga ulike kutya ope na ompito opo Kanime a kale e na ondjo. Okwa popi kutya ekutho miilonga lye otali gandja ompito opo ku ningwe omakonaakono, na otaga kala ga manithwa muule woomwedhi mbali.

Okwa popi kutya omilandu dhekutho miilonga ndhoka dha monika tadhi topolwa komapandja gomakwatathano gopainternet odha pewa Kanime pauyemwene.

Kahimise okwa popi kutya omilandu dhelelo lyoshilando itadhi utha ekundathano lyiipambele yaaniilonga niikundaneki. Tango Kanime okwa kuthwa miilonga pwaahena ondjambi na okwa pewa sigo omasiku 14 gaApilili opo a gandje omatompelo kutya omolwashike e na okumonena ondjambi ye. Kahimise okwa popi kutya Kanime okwa gandja omatompelo ge meendelelo, nomomutumba ngoka gwa ningwa mOmaandaha okwa tokolwa opo a kuthwe miilonga ta futwa ondjambi ayihe ya gwana po. Kanime okwa lombwelwa a gandje ooshapi dhombelewa ye nokugandja uukalata yoku mu pitika moombelewa, onzapo ye yeuliko miilonga na okwa lombwelwa opo a kale kokule noombelewa dhelelo lyoshilando. Omilandu dhekuthombinga lye, odha kwatelamo okutseyithila Kahimise pamushangwa ngele okwa hala okuya pondje yOvenduka pethimbo lyoowili dhiilonga.

Omukanda ogwa pula Kanime opo a kale a pyakudhukwa ethimbo kehe okuya kiilonga ngele okwa mono elombwelo.

Kahimise okwa popi kutya oshikumungu shoka itashi hwahwamekwa kiinima yopaumwene pokati ke naKanime, ta popi kutya andola natango osha li omuntu gumwe, andola okwa kuthwa owala miilonga.

Sho a pulwa ngele Kanime otaka tulilwa mo iipotha ngele okwa monika ondjo momakonaakono ngoka taga ningwa, Kahimise okwa yamukula kutya kape na uumbangi manga.

Moombapila dhompangu, Kanime omvula ya piti okwa popi kutya Kahimise pamwe nelelo lyoshilando otaye mu ningile omailitho nokwiidhopa miilonga ye. Kanime okwa popi kutya uupyakadhi owa tameke sho opolisi ya yi moshipala edhengelo lyoombashu mo7de Laan muNovemba gwomvula ya piti. Okwa popi kutya ookansela oya tameke taye mu ningile omatilitho. Kahimise okwa li a yamukula kiipotha mbyoka, na okwa pula opo yi kuthwemo. Kamine okwa kutha mo iipotha mbyoka nuumvo, sha landula omutumba gwa ningwa kuye pamwe namayola gwoshilando Muesee Kazapua oshowo omukomeho gwopolisi Sebastian Ndeitunga .

Kanime okwa ningi menindjela gwomayakulo gegameno moshilando shoka mo 2001, nomo 2002 okwa ningwa omukomeho gwOshikondo shOpolisi yOshilando.Senior Superintendent Nathaniel Nendongo oye ta longo pehala lyaKanime.

ELLANIE SMIT