Auntie Nangy Oshi

Ondi na oongunga odhindji Meme Nangy onda lulilwa noonkondo, ondi na oongunga itandi vulu oku dhi futa. Nandi ninge ngiini? Oku kala wuna oongunga onkalo ondhigu noonkondo molwaashoka oongunga wuna ohadhi kala tadhi londo pombanda kehe esiku uuna wa ndopa okufuta. Shoka wa pumbwa okuninga okuya moonkundathana naamboka wuna oongunga dhawo opo mu tulepo omauvathano kutya oto kala to futu ngiini oongunga dhaantu. Ndhidhilika kutya oku kutha oongunga dhagwedhwapo opo wu fute oongunga ndhoka wuna nale ka shi shi ekandulepo lyuupyakadhi mboka na ino ninga oshihakanwa shomahangano ngoka haga ti kutya otaga futu oongunga dhoye ngoye to kala to futu kuyo molwaashoka naatango iihohela yaantu mboka otayi kala pombanda na kuna esiku wu ka mane okufuta oongunga ndhoka wuna. Otandi ku kumagidha woo opo ku kale to yanda nenge to holama aantu mboka wu na oongunnga dhawo, gwonale okwa tile ‘aantu oyeshi lya popi, kaye shi lyamwena’ nuuna wakala to holama owala, ngoye itoyi wu ka popye uupyakadhi woye nena shoka naatango itashi kandulapo uupyakadhi ihe otashi ku etele owala elondo lyombinzi molwaashoka oto kala kehe ethimbo to dhilaadhila onkalo ndjoka. Kongapo woo omukalo gwokumona iiyemo wa gwedhwapo opo wu vule okufuta oondjo dhaantu. Okwa thigandje po Ondi na uupyakadhi womusamane gandje twa hokana naye paveta mo-1994 ihe mo-2005 omusamane gandje okwa shuna koshilongo shawo sigo onena ina galuka. Ope na omusamane gumwe a hala okuhokanandje nandi ninge ngiini? Inda koveta opo wu ka hokolole ehokololo lyoye ndyoka, opo ondjokana ndjoka yi vule okuteka ngoye wu vule oku pula komeho nondjokana yoye ndjoka ompe. Oshidhigu okukala wuli mondjokana ndjoka omanga ku shi ngele omusammane gwoye ota galuka nenge ita galuka ngele iha ningi nando onkambdhala a popye nangoye ye eku yelithile. Otashi vulika woo hoka eli a li a hokana nale na okwa shuna komukulukadhi gwe nenge a hulitha nando okuli okugandja owala oshiholelwa. Ka konge ekwatho koveta. Iha kwatha oyana Ondi na he yuunona wandje uwali, ihe iha yambidhidha nando uunona we, kehe esiku ota pendje owala omahokololo ga yooloka. Nandi ninge ngiini? Kehe esiku ohandi popi kutya oshinakugwanithwa shesiloshisho lyuunona oshi na okukala komapepe gomuvali kehe kutya oha mono iiyemo yasha nenge iha mono. Uunona itatu wu yambidhidha owala pashimaliwa ihe uuteku womondjila, okufala uunona koskola noku uvitha uunona wetu ohole oshi li oshinakugwanithwa shaavali. Ngele nena he yuunona woye ihe wu yambidhidha inda kombelewa yamangestrata opo wu ka konge ekwatho ye omulumentu ngoka a pewa oshinakugwanithwa shoku sila oshipwiyu uunona molwaashoka aalumentu oyendji ihaya kutha oshinakugwanithwa shoka ku yoyene omanga inaya ka tukilwa oonkatu koveta. Omanga ino ka konga ekwatho yelithila omulumentu ngoka oshinakugwanithwa she shoka eto pula opo alundulule omaihumbato ge ye ta tameke okusila oshisho oyana nuuna a ndopa nena mu lombwela woo kutya ku na we shoka to vulu okuninga ihe okuka konga ekwatho koveta. Ohandi zi ezimba Meme Nangy ondi na uupyakadhi we zimba ewinanyi hali zi puulumentu wandje wo uulumentu wandje owafa woo wa topolwa miitopolwa iyali ihe sho tandi pula aantu otaya ti osho owala tandi koko, nandi ninge ngiini? Ondi na oomvula 19. Owa pumbwa oku ka mona omundohotola gwaalumentu oye ta vulu oku ku konaakona nokumona kutya uupyakadhi woye owuli peni, osha pumbiwa shili okukonga omayele okuza maantu ihe ngele omuntu ote ku pe omayele gaashi kutya inda wu ka konge ekwatho lyopaunamiti nena omayele ngoka ka geli mondjila. Aluhe ngele otwiiyadha twa limbililwa konkalo yuundjolowele wetu nena otwa pumbwa okuya meendelelo koshipangelo, molwaashoka ethimbo limwe onkalo yimwe ohayi vulu okukala tayi pangwa uuna ya monika mbala ihe molwaashoka ihatu yi mbala koshipangelo nena otatu kiiyadha ta ku ti onkalo yetu itayi vulu okupangwa tse tatu kala twiikolelela owala komiti oonkalamwenyo dhetu adhihe. Inda koshipangelo wu ka pangwe ye omundohotola e ku yelithile iitopolwa mbyoka to popi.