Aanuuvu yuulepela natango taya tongolwa moshigwana

Oshinano shookilometa 50 muuzilo waRundu, otamu adhika omukunda Mashare moka tamu lumbu aakwashigwana ye na omukithi gwuulepela ya thika po 74.

Omukithi ngoka ohagu gumu oshipa shomuntu nokweetitha onkalo yiitumbuka ndjoka hayi fala muulema.

Namibian Sun okwa talelepo omukunda ngoka oshiwike sha piti, nokuya moonkundathana naEster Magano Alupe (70). Alupe okwa monika omukithi gwuulepela momvula yo 1975. Nonando ngashiingeyi okwa aluka, omukithi ogwa yonagulwa iikaha ye oshowo oompadhi dhe.

Alupe okwa zile momukunda Onyaanya moshitopolwa shaShikoto ihe okwa kala moMashare hoka kwali ku na oshipangelo sha tungwa sha nuninwa aakwashigwana mboka taya lumbu nomukithi ngoka.

Oshipangelo shoka osha li sha patwa moomvula dho 1980 sho aakwiita yaSouth Afrika ya tokola okuninga po oshipangelo shoka okamba yaakwiita.

Pethimbo ndyoka aapangwa oya thiminikwa nokushuna komikunda dhawo hoka ya zile, ihe Alupe okwa tindi okugalukila kegumbo nuutile kutya otaka ningilwa okatongo, na okwa tokola okukala moMashare.

Ohazi pamwe nomusamane gwe, Erickson Uusiku (83), aatekulu oshowo aatekulululwa.

Alupe okwa aluka okuza komukithi ngoka na inegu taandelitha mofamili.

Alupe ngoka e li mokomitiye yaantu mboka taya kalelepo aapangwa yuulepela, okwa popi kutya onkalo oya nayipala ngele tashi ya komayambidhidho nomakwatho gaamboka ya aluka okuza komukithi ngoka, nenge mboka taya lumbu nomukithi ngoka natango.

Okwa popi kutya omwaalu omunene gwaantu mboka yali pamwe naye mendiki ndyoka ogwa hulitha omolwa esiloshisho ndyoka kali po.

“Aantu mboka taya lumbu nomukithi gwuulepele otaya mono iihuna moMashare,” Alupe a popi.

“Emono lyiihuna olya londa unene nuumvo sho mboka yali haye tu sile ohenda nayo taya dhengwa koshikukuta, na kaye na shoka taya vulu okugandja.

“Ngashiingeyi otwa tegelela owala tu mone aasamalia aanamutimahenda ya gandje omagano goondya kombelewa yakansela.”

Omwedhi gwa piti, Omaru Fishing onga oshitopolwa shawo sheyambidhidho moshigwana oya gandja omagano giipakete yoondooha dhoohi, noohi ndhoka odha topolelwa po aakwashigwana mboka taya lumbu nomukithi guulepela.

“Tse yamwe otu na elago molwaashoka otu li poofamili dhetu ndhoka dhetu taambako, ihe ope na mboka yaana esiloshisho na oya ethiwa owala yase.

“Otaya lumbu nomaulema gomeho, uulema mboka wa yi moshipala omainyengo gawo na itaya vulu okwiikwathela sigo ya hulitha,” Alupe a popi.

Okwa popi woo kombinga yeyakulo ndyoka haya mono miipangelo ta popi kutya ihaya pewa epango lyashewa ngaashi nale pethimbo ya li ye na endiki ndyoka. Okwa popi kutya uuna ya talele po iipangelo ohaya pewa owala omiti dhopanado ndhoka hadhi nayipalitha omukithi, pahapu dhe.

Okwa tsikile ko kutya nonando ongaaka okatongo hoka haka ningilwa aantu mboka kake shi we okanene okuyeleka nonkalo nale, ta gwedhapo kutya aantu ngashiingeyi otaya hala okutaambako aanuumvu mboka.

Oonkambadhala okumona uuyelele okuza komukomeho guundjolowele miitopolwa yaKavango, Timea Ngwira, odha hulile muunyengwi, ihe sho kwa ningwa ekwatathano nomugandjimayele gwowina muundjolowele kombelewa yomupeha presidende, Omundohotola Bernard Haufiku, okwa popi kutya kape na ompumbwe yokuningila omatongo aantu mboka.

Sho a popi kombinga yetalelepo lye moMashare, Haufiku okwa popi kutya okwa nongele kutya aantu oyendji oya aluka okuza komukithi ngoka, ta popi kutya uulema mboka hawu holoka poo owo unene hawu etitha okatongo, ta popi kutya shoka inashi pumbiwa molwaashoka omuntu ota vulu okuminika nenge okulya pamwe nomuntu ngoka aaluka okuza komukithi ngoka.

Haufiku okwa dhenge omuthindo kutya uuna omuntu a tulwa kepango lyomukithi ngoka ihe vulu we okutaandelitha omukithi.



KENYA KAMBOWE