Aahingi yiihumbata nawa

Aahwahwameki yegameno lyomoondjila oye shi pondola uule woomvula mbali ngashiingeyi okukaleka pevi iiponga yiihauto pethimbo lyiituthi yomatango omanene.

Nonando omwaalu gwaantu mboka ya hulithile miiponga ogu li pombanda nomaso 70 pokati kesiku lyotango lyaDesemba sigo omasiku gatano gaJanuari, omwaalu ngoka ogu li pevi noopresenda 20, okuyeleka nomaso ga lopotwa pethimbo lya faathana omvula ya piti, sho aantu 88 ya hulithile miiponga.

Omiyalu ndhoka dha pitithwa kehangano lyoMotor Vehicle Accident (MVA) Fund of Namibia, okwa dhidhilikwa eshuno pevi miiponga yomoondjila noopresenda 8, sho kwa lopotwa iiponga 367 okuyeleka niiponga 400 mbyoka ya dhidhilikwa pethimbo lya faathana omvula ya piti. Natango okwa lopotwa kutya aantu yeli po 682 oya ehamekelwa miiponga okuyeleka naantu yomwaalu guli po 703 mboka yeehamekelwa miiponga omvula ya piti.

Eshuno pevi olya dhidhilikwa woo pethimbo lyiituthi yomatango omanene momvula yo 2018 no 2019.

Pokati komasiku 25 gaNovemba omvula yo 2018 nomasiku gatatu gaJanuari 2019 okwa dhidhilikwa eshuno pevi miiponga noopresenda 14, eshuno pevi lyoopresenda 18 momayehameko giiponga oshowo eshuno pevi noopresenda 29 momaso ngoka geli oshizemo shiiponga yomoondjila.

Opolisi yaNamibia oya lopota oshiwike shika kutya aahingi oya li yiihumbata nawa nokwiiyutha koompango dhomoondjia pethimbo ndika, sho aahingi yomwaalu omushona ya adhika ya longitha iikolitha pethimbo taya hingi, okuyeleka nomvula ya piti.

Omiyalu dha gandjwa kopolisi koshikondo shegameno lyomoondjila, odha holola kutya aahingi ya thika po 79 432 oya konaakonwa kaanambelewa pokati komasiku 18 gaNovemba sigo omasiku gatano gaJanuari, naalumentu 1 299 oshowo aakiintu 145 oya adhika ya longitha iikolitha ihe yamwepo ondjele yiikolitha ya adhika moombinzi dhawo inayi ya pombanda yaandjoka ya tulwa po paveta.

Aahingi ya tulwa miipandeko omolwa okuhinga ya longitha iikolitha oyeli po 236.

Natango aanambelewa oya kutha ongushu omikanda dhiihauto yi li po 501 omanga aahingi 777 ya pewa omalondodho.b Omageelo geli po 10 724 geyo pondje lyooveta dhomoondjila oga gandjwa na oge li gongushu yoomiliyona 11.2, pakoleko lya gandjwa kopolisi.

Horst Heimstadt gwoPrivate Sector Road Safety Forum (PSRSF) okwa zimine kutya omaihumbato gaahingi otaga lunduluka, ihe nonando ongaaka okwa popi kutya ompumbwe yoonzo oyi Ii eshongo kuyo.

MVA Fund okwa popi kutya iitopolwa shaKhomas oshowo Otjozondjupa oya dhidhilike egwo pevi miiponga noopresenda 20.

Omwaalu gwomaso onga oshizemo shiiponga miitopolwa shaMusati, Zambezi nErongo nagwo ogwa shuna pevi.

Eshuno pevi lyomaso taga etitha kiiponga lyoopresenda 89 olya dhidhilikwa moshitopolwa shaMusati sho mwa lopotwa eso limwe okuyeleka nomaso omugoyi ngoka ga lopotwa omvula ya piti.

Moshitopolwa shaZambesi omwa lopotwa omaso gatatu okuyeleka nomaso gaheyali ga dhidhilikwa omvula ya piti naashoka oshi li eshuno pevi noopresenda 57.

Moshitopolwa shErongo omwa lopotwa omaso gatatu okuyeleka nomaso gahamano omvula ya piti nomwaalu omunene gwomaso ogwa dhidhilikwa moshitopolwa Otjozondjupa moka aantu 19 ya kanithile oomwenyo dhawo okuyeleka naantu 10 mboka ya hulitha omvula ya piti.

Iiponga yiihauto ya galangata yi li 93 oya lopotwa, mbyoka ya kwatelemo aayendi kolupadhi oyi I 92, omaipumo mumwe ogeli po 89.

Aahingi yoombasikela yeli 14 okwa lopotwa ya mono iiponga omanga 12 ya gu miiyenditho tayi ende.

JANA-MARI SMITH