A hala okufutitha epangelo

Omukalelipo gwopaveta a tseyika nawa koyendji, Titus Iipumbu, okwa popi kutya okwa pyakudhukwa okukwathela aakwanezimo yaFrieda Ndatipo ngoka a dhipagwa kopolisi, opo ya futithe epangelo. “Ngele onda mono elombwelo okuza kaakwanezimo yanakusa nena otandi ka katuka onkatu ihe monena itandi vulu okushininga kungame mwene,”Iipumbu ta ti. Iipumbu okwali poombelewa dhOngundu yoSwapo, mpoka pwa dhipagelwa Ndatipo kopolisi ongula yEtitatu. Ndatipo okwa hololwa kutya okuli yina yuunona utatu. Iipumbu okwayi opo a ka uve olukeno naanona mboka ya valelwa mekondjelomanguluko pondje yoshilongo, sha landula eso lyaNdatipo ndyoka lya thigi oshigwana tashi popi. Omukomeho gwOpolisi yaNamibia Sebastian Ndeitunga okwati, oondjembo niikuti mbyoka ya longithwa pehala lyoshiningwanima shoka otayi ka konaakonwa. Iipumbu okwati, aanona mboka ya tsininwa omuku gwomahodhi opamwe nuunona wawo nayo otaya vulu woo okutulamo oshipotha. Okwati, ota kaya woo moonkundathana naNdeitunga opo ku kuthwe miilonga manga omunambelewa ngoka a yaha Ndatipo, ta pula woo opo ku tulwe miilonga okomitiye ndjoka tayi ka tungapo olopota kombinga yoshiningwanima shoka. Ndeitunga okwati, oshikumungu shoka ashihe otashi ka konaakono na oshi li oshidhigu okugandja uusama nokuulika ominwe pethimbo ndika. “Oshidhigu okuninga omatokolo pethimbo ndika. Otu na okupulakena koombinga adhihe mbali moshikumungu shika opo nee ta tu vulu okuninga etokolo,” Ndeitunga ta ti. Okwati, opwali omaumbathano noondjembo pethimbo lyoshiningwanima shoka sha ningwa mEtitatu nongundu yaakonaakono tayi ka totwapo opo ya vule okuninga omakonaakono moshiningwanima noshigwana otashi ka tseyithilwa oshizemo shomakonaakono. Iipumbu okwa ekelehi omapopyo kutya ope na omuntu omutitatu ngoka ta longitha aanona mboka, na okwa popi ngaaka sha landula omapopyo gOmuprima minista Hage Geingob. Geingob okwa popi kutya ope na mboka taya longitha aanona mboka, naIipumbu okwati, kehe ethimbo aakwashigwana taya holola omaiyuvo gawo gopaudemokoli, aaleli ohaya gama owala kopolotika nokupopya kutya ope na mboka taya longithwa aantu mboka. Okwati, omahololomadhilaadhilo ngoka otaga ningwa molwaashoka aanona mboka oya hala iilonga na ka pe na we omatompelo galwe! Amushanga- Ndjai gwOngundu yoRally for Democracy and Progress Mike Kavekotora okwati, Swapo oye eetitha evundakano ndyoka petameko molwaashoka okwa gandja iilonga kaanona yamwepo. Okwati, opolisi kaya li tayi gamene uundemokoli ihe Ongundu yoSwapo. “Kape na etompelo kutya omolwashike omukiintu ngoka a dhipagwa momukalo ngoka gunyanyaleka” Kavekotora ta ti. Omupresident gwoRDP Hidipo Hamutenya okwati, nonando aanona mboka oyo ya umbu tango, nena oohasa nomakanona gomeya oshowo oondjembo dhoongumi odhali dhina okulongithwa mokukalekapo ombili unene sho Ndatipo a yahwa omanga a li tayi ontuku opolisi OVENDUKA SELMA IKELA