Ta futitha uuministeli wuundjolowele

10 July 2019 | Justice

Omukiintu ngoka a popi kutya okanona ke oka hulitha onga oshizemo shuuhasha moshipangelo shEngela momwedhi Kotomba momvula yo 2017, ota futitha uuministeli wuundjolowele oshimaliwa sha thika petata lyomiliyona.

Peelina Shiwovanhu Nghikumwa (40) okwa popi kutya okwa taambelewa moshipangelo sha tumbulwa momasiku 20 gaKotomba omvula yo 2017, ihe aapangi oya tindi oku mu kwathela omanga a li moshitheta.

Pehala oya kala taye mu popi nokumu yola omolwa uuwehame moka a li taya mu lombele opo a ka ende ye a kuthe po uuwehame.

Okwa popi kutya okwa pulumutha okanona ke kuye mwene molwaashoka aapangi oya tindi oku mu kwathela. Oombaapila dhompangu odha popi kutya okanona oka gwile pevi omutse okuza moshivalelo shayina sha etitha eso lyako.

Eso lyokanona hoka olya li lya holoka miikundaneki pethimbo ndyoka.

Oshifokundaneki shoNamibian Sun, osha Ii sha lopota pethimbo ndyoka kutya Nghikumwa ota pangele okufutitha uuministeli molwaashoka oku na uumbangi kutya okanona ke andola oka valwa nomwenyo na oka hulitha sho ka ehama momutse sho kiidhengepo.

Okwa popi kutya aapangi oye ke mukwathela owala sho okanona kiidhenge po.

Nghikumwa, ngoka ta yambidhidhwa koLegal Assistance Centre (LAC) meindilo lye lyOmpangu yoPombanda, ota gandja uusama kaaniilonga moshipangeo kutya oya ndopa okugwanitha po iilonga yawo mepulumutho lyokanona ke.

Okwa popi kutya aaniilonga mboka oya kala ye shi shi kutya endopo lyawo okugandja ekwatho kuye otashi vulu okutula moshiponga omwenyo gwe nogwokanona ke.

Ota pula a futwe oshimaliwa shooN$500 000 omolwa uululume wopamadhilaadhilo nehaluko oshowo oshimaliwa shooN$15 000 mefumbiko lyokanona ke.

Ota pula woo oshimaliwa sha gwedhwapo shooN$50 000 shiifuta yomonakuyiwa yuunamiti wopamadhilaadhilo oshowo ehungomwenyo.

Epulakeno lyoshipotha shoka olyuundulilwa komasiku 9 gaSepetemba. Corinna van Wyk gwoLAC, ota kalelepo Nghikumwa, omanga epangelo tali kalelwa po kuLindrowski Tibinyane, hahende gwepangelo. Omukwateli gwoshipotha shoka komeho, omupanguli mOmpangu yoPombanda Herman Oosthuizen.

JANA-MARI SMITH