PDM a tindi oongodhi dhoHuawei

02 July 2018 | Local News

Omupresidende gwongundu yoPopular Democratic Movement (PDM), McHenry Venaani oshiwike sha piti okwa tindi mOmutumba gwoPashigwana, ntano dhomootablets o 157 dhoHuawei ndhoka dha pewa aanapaliamende kehangano lyaChina, lyoHuawei technology company.

Okwa popi kutya iilyo yimwe yoPDM oya kala ya tegelela a galuke okuza koEuropa opo ya shunithe ootablets ndhoka kOminista yOmauyelele, Stanley Simataa.

Omupya omunene, Simataa, ka li mo momutumba gwopaliamende mEtine opo a vule okutaambako oongodhi ndhoka.

PDM okwa tindi omagano ngoka ga gandjwa kehangano ndyoka molwaashoka oli na omalalakano gongeshefa moNamibia, na olya hala okugandja oombumbo onga omagano kaanapolotika yaNamibia.

Etokolo ndyoka lya ningwa koPDM, olya landula oolopota dha ningwa kiikundaneki kutya ehagano lyoHuawei olya sindana po okondalaka yoMTC opo li kale tali gandja iikwaniipangitho yomatumo gomawi yi li po 520, yongushu yoobiliyona 1.1.

Omuprima minista, Saara Kuugongelwa-Amadhila, nonando ongaaka ina nyanydhudha ketokolo lyaVenaani.

Okwa popi kutya kape na oshilyo shoka sha li sha kondjithwa okutaambula omagano ngoka, ta popi kutya uuthemba waVenaani okutinda omagano ngoka.

Okwa gwedha po kutya ita tsu kumwe nomapopyo gaVenaani kutya omagano ngoka oga nuninwa onga omukalo gwokufuta oombumbo aanapolotika.

Iiwike iyali ya piti, ehangano lyoHuawei olya gandja omagano gooHuawei MediaPad M3 Lite tablets o 157 kaanapaliamende, nootablets ndhoka odhongushu yoshimaliwa shooN$700 000.

Ootablets ndhoka odha tambulwa ko nomaiyuvo ga yooloka kiilyo yopaliamende , mboka yimwe ya popi kutya oongodhi dhehangano lyoHuawei, ohadhi longithwa mokundaadha, aanapolotika oshowo aanenentu.

Nonando ongaaka, Simataa okwa kwashilipaleke aanapaliamende yakwawo kutya oya tala tango konkalo yegameno omanga inaya taambako omagano ngoka.

NAMPA