Oshipangelo shaShikuku tashi tamanekwa

12 January 2018 | Health

Uuministeli wuundjolowele inawu vula okugandja epeko lyondjokonona yepango lyomukokele ngoka a pangwa moshipangelo shaSt Martin, mOshikuku koHealth Professions Council of Namibia (HPCNA).

Ofamili yomukokele ngoka, otayi popi kutya okwa lemana konima sho a kalekwa moshipangelo shoka uule woomwedhi hamano e na onto ya za pehala.

Ngoka ta longo pehala lyomukomeho gwoshipangelo shoka, Dr Samwel Awe, okwa popi kutya inaya vula okumona epeko lyondjokonona yomupangwa ngoka, Jonas Nehemia, ngoka a pangwa moshipangelo shoka okutameka momasiku ga 8 gaNovemba 2010, sigo Aprili gwo 2011.

Omukomeho gwiikwaveta moHPCNA, Sylvia Hamata, okwa popi kutya oya kala noku ninga eindilo lyepeko ndyoka okuza koshipangelo ihe sigo onena uuministeli wuundjolowele inawu vulu okugandja epeko ndyoka.

Shoka osha uvitha nayi omukulukadhi gwaNehemia, Susana Matheus, 75.

“Oya panga omusamane gwandje konyala uule woomwedhi heyali moshipangelo shawo ihe nena otaya popi kutya itaya vulu okumona epeko ndyoka? Shoka kashi shi oshili, oye li fala peni?” Matheus a pula.

Okwa tsikile kutya oya li ye na omukumo nale ihe ngashiingeyi oya kanitha omukumo. Okwa popi kutya omusamane gwe iha inyenge we, na ye oha kala megumbo kehe ethimbo opo e mu sile oshipwiyu.

Ofamili yomunamimvo 84, Nehemia oya tulamo enyenyeto noHPCNA, tayi kongo omayamukulo kutya omolwashike oshipangelo sha taambele moombete omukokele ngoka omanga inashi mu ningila omakonaakono goX-ray.

Nehemia, ngoka e li mwene gwomukunda Oshiku Shomunkete, okwa gu omanga a li ta kongelele iimuna ye momasiku ga 7 gaNovemba mo 2010. Okwa falwa moshipangelo shaShikuku esiku lya landula na okwa kala moshipangelo sigo omwedhi Apilili omvula ya landula.

Ofamili oya popi kutya moshipangelo shoka, Nehemia okwa kala owala ta mangululwa na ina pewa we epango limwe. Ina inyenga sigo a lalekwa moshipangelo shoka muApilili gwo 2011.

Ofamili oya popi kutya oshipangelo inashi mona kutya epuko oli li peni.

Omukokele ngoka okwa lalekwa nokushuna kegumbo ihe ina vula okweenda okwa kala owala mombete.

Konima yomwedhi mbali ofamili ye oyemu fala moshipangelo shaShakati, hoka a ningilwa omakonaakono gox-ray na okwa monika kutya onto ye oya za pehala na osho sha etitha uulema we. Oya lombwelwa kutya ita vulu we okupangwa molwaashoka onto oya ninga ethimbo ele ya za pehala.

“Oya popi kutya kaye na shoka taya vulu okuninga molwashoka okwa li omupangwa gwomOshikuku na inaya hala okwiitula muupyakadhi. Oye mu tumine owala kepango lyophysiotherapy moshipangelo shaShikuku,” Silas Emvula, omona gwaNehemia a popi.

Okwa popi kutya he oye mu fala moshipangelo shaShikuku na kape na shoka sha ningwa, na okwa lemana sigo onena.