Oshikumungu shaNSFAF tashi kundathanwa

Iiputudhilo yelongo nayo otayi ka gumwa nayi ketokolo lyaNSFAF

07 June 2019 | Education

Omuprima gwoshilongo okwa pula opo ku ningwe omutumba naakuthimbinga, opo ku vule okukundathana onkalo yaailongi, omanga iiputudhilo yelongo lyopombanda oya popi kutya otayi ka gumwa nayi.

Eshunitho pevi lyomwaalu gwaailongi mboka taya pewa ekwatho koshiketha shokuyambidhidha omailongo gaailongi ano NSFAF, otali kagumwa nayi oshiputudhilo shoNamibia University of Science and Technology (NUST) pahapu dhomunambelewa omupopiliko gwoshiputudhilo shoka Kaitira Kandjii.

Omunashipundi gwoInternational University (IUM) of Management, David Namwandi naye okwa popi kutya onkalo yanayipala yopaliko moshilongo oya gumwa kehe gumwe na kashi shi owala aailongi.

Konyala aailongi ya thika po 12 000 yomvula yotango oya thigwa pomutenya sho itaya vulu okupewa eyambidhidho sigo uuna epangelo lya thitike omwakwa gwoomiliyona 641 ngoka gwa taalela oshiketha shoNamibia Students Financial Assistance Fund (NSFAF).

Omupresidende gwoNamibia National Students Organisation (Nanso), Ester Simon okwa lombwele oNamibian Sun kutya okwa ithanwa omutumba nOmbelewa yOmuprima Minista.

Omutumba otagu ka kala pokati kuuministeli welongo lyopombanda, uuministeli wemona, Nanso oshowo NSFAF.

Nanso okwa hiiya woo aanyasha miikondo ya yooloka mba taya vulu okugandja uuyelele nomiyalu nkene etokolo ndyoka tali ka guma aailongi.

“Otwa pumbwa okukala twiilongekidha sho tatu kuutumba nayo. Ngashiingeyi aanaskola oye li momalimbililo molwaashoka kaye shi kutya onakuyiwa yawo oyuuka peni.”

Omupopiliko gwoNust okwa popi kutya iiyemo mbyoka haya mono okuza kaailongi oya simana noonkondo koshiputudhilo.

Okwa popi kutya aailongi ya thika pe 1 000 yoshiputudhilo shoka oya gumwa ketokolo ndyoka lya ningwa.

Kandjii okwa tsikile kutya elelo lyoshiputudhilo otali ka konga omilandu dhokuungaunga nonkalo ndjoka ya taalela.

Omutotipo gwoIUM, Dr David Namwandi, okwa popi kutya oku na einekelo kutya aailongi mboka taya hupu nuudhigu otaya ka mona ekwatho.

Okwa gwedha po kutya oye na ontseyo kutya oshilongo osha taalela onkalo yopaliko ya dhigupala.

Namwandi ngoka a li ominista yelongo okwa popi kutya oshiputudhilo shawo oshiigilila onkalo ndjoka na osha tula miilonga omilandu dhokuungaunga nonkalo yoludhi ndoka.

“Otuuvite olukeno pamwe naailongi mboka yiikolelela owala moNSFAF. Otu shi shi kutya uupyakadhi wopashimaliwa owa guma kehe gumwe moshilongo ihe kashi shi owala aailongi. Uupyakadhi mboka wa taalela aailongi, owa taalela woo epangelo na kehe gumwe,” Namwandi a popi.



JEMIMA BEUKES