Oongombe mbali nenge ooN$4 000 omolwa omapopyo guulodhi

30 June 2020 | Local News

KENYA KAMBOWE

MUPINI



Aanyasha mboka oya pewa egeelo kelelo lyoMbunza Traditional Authority. Mboka aniwa oya lundilile uulodhi mwene gwomukunda gwaMupini, Frieda Neromba sha ningilwa kepandja lyoWhatsApp, hoka ku na iilyo ya thika pe 123.

Aanyasha otaya lundile Neromba kutya ota ningile omaulodhi kepandja ndyoka lya totwapo momasiku 26 gaMei.

Iifuta mbyoka oya li yi na okukala ya futwa esiku ndyoka, ihe Omukomeho gwoMbunza Traditional Authority, Alfons Kaundu, okwa yelitha kutya omilandu dhopamuthiglulwakalo, otadhi utha iifuta yi futwe muule womasiku 14, nenge ethimbo otali vulu okulelepekwa kwiikwatelelwa koonkundathana pokati koonakufutithwa noonakufutwa.

Oshifokundaneki shoNamibia osha nongele kutya omananathano ngoka oge etithwa kemino lyevi okuza momukunda ngoka, ndyoka inali nyanyukilwa kaanyasha yomomukunda.

Omukalelipo gwongundu ndjoka Ausiku Mbamba oshowo Siwoko Reino, oye li momusholondondo gwaamboka ya futithwa, na oya popi mOlyomakaya kutya egeelo lyawo oli li oshizemo shokupopya oshili yokwaahena uuyuki oshowo iinima kayi li pamulandu mbyoka tayi ningwa momukunda gwawo.

Ongundu ndjoka oya pula kutya osha ende ngiini Wakudumo a mone epitikilo lyokumina evi naakwashigwana otaya mono uuwanawa ngiini okuza memino ndyoka, nomapulo ngoka oga ukithwa kuNeromba a yamukule.

Mbamba okwa popi kutya oonkambadhala okumona omayamukulo okuza kuNeromba odha hulile muunyengwi sigo osho a tsakanene naanyasha momasiku 21 gaJuni.

Omutumba omutiyali ogwa li gu na okukakako mEtitatu ihe sho ku na owala oowili ooshona okuya komutumba omunyasha gumwe okwa shanga kepandja lyoWhatsApp kutya: “Nena mwene gwomukunda ota ka uva ongeyo yandje okuza mokana kandje, ngele ope na uulodhi nandi logwe,”. Mbamba naReino oya popi kutya itaya futu omageelo ngoka molwaashoka kaye na ondjo. Ya popi kutya epangulo lyawo kalya li pauyuuki.

Oya gwedha po kutya omolwashike ye na okugeelwa ngele nani omuntu ngoka a shanga etumwalaka ndyoka okwa zimina ondjo. Inatu pewa ompito twiipopile kakele kokupulwa omapulo getu ukilila. Inatu nyanyukwa natango kutya naku nyenyeta okwa li oshitopolwa shaamboka taya pangula.

“Otwa thiminikwa okutaamba omageelo nokufuta iifuta.”

Sho a ningilwa omapulo, Neromba okwa popi kutya okuuvite nayi natango kwaashoka sha holoka po na okwa tindi okutya sha.