Oondoolopa tadhi ndopa

12 July 2018 | Environment

ILENI NANDJATO & NAMPA

Ominista yomidhingoloko, Pohamba Shifeta, oya popi oshiwike sha piti kutya omatoto agehe giiyagaya ngoka ga ningwa komalelo goondoolopa moshilongo kage li pamulandu.

Okwa popi kutya omatoto ngoka inaga gwanitha po iipumbiwa ngaashi mbyoka ya uthwa kompango yoEnvironmental Management Act 2007 (Act No 17 of 2007), nuuministeli we owiipyakidhila okutula po omulandu ndhoka tadhi ka pewa omalelo goondoolopa.

Lwopokati mpoka omuyalulimambo gwepangelo, Junias Kandjeke okwa gandja uusama kuuministeli mboka unene koshikondo shomidhingoloko kutya pamwe naakuthimbinga yalwe oya ndopa okukwashilipaleka kutya omalelo ngoka kalele kelelo lyaVenduka oya tula omanagement environmental plans (EMPs) dhomahala gawo gokweekelahi iiyekelwahi.



Momvula yo 2013/14, 2014/15 oshowo 2015/16 okwa tulwa momutumba gwopashigwana olopota yi na sha nomahala goku ekelahi iiyekelwahi komalelo goondoolopa, kominista yemona, Calle Schlettwein.

Olopota ndjoka pahapu dhaKandjeke oya holola kutya oshikondo shomidhingoloko inashi kwashilipaleka kutya omalelo goondoolopa oga tula miilonga oEMP dhawo shomahala goku ekelahi iiyagaya.

Olopota oya holola kutya konyala omahala agehe ga talelwa po kaleke koshilando shaVenduka, oga ndopa.

Oondoolopa ngaashi Rundu, Ondangwa, Ongwediva oshowo Oshakati odha mono oombaapila ndhoka tadhi pula opo dhi gandje ooEMPs moshikako shomvula yo 2015/16.

Nonando ongaaka okwa hololwa kutya oondoolopa ndhoka odha ndopa okugwanitha po shoka dha pulwa.

Omakonaakono ngoka oga ningilwa iitopolwa ngaashi Khomas, Erongo, Hardap, Kavango East, Kavango West oshowo Oshana.

Olopota ndjoka natango oya holola kutya oshikondo shomeya nomakuti mUuministeli wUunamapya osha ndopa okukondolola omalelo gondoolopa okukwashilipalekakutya ogiiutha komilandu dhoWastewater Effluent Exemption Disposal Permit.

Natango oshikondo shoHousing, Habitat, Planning and Technical Services Coordination, shoka sha longitha iimaliwa ya thika piibiliyona 3.8 momvula ndjoka osha ndjoka osha ndopa okukondolola omahala ngoka haga ekelwahi iiyekelwahi koondoolopa.

Oshikondo shoka shi li kohi yUuministeli wOmayambulepo goondoolopa niitopolwa, osha ndopa okukwashilipaleka kutya omahala ngoka oga tulwa iikwaniipangitho mbyoka tayi pumbiwa, na ngele ogeli tuu pamuthika.

Kandjeke okwa dhidhilike endopo olindji okuza komalelo ngoka, ngashi omilandu dhili mondjila dhoku ekelahi iiyekelwahi, oshowo omakwatakanitho ngoka inaga ningwa mondjila.

Olopota ndjoka oya li ya ningwa okukwashilipaleka ngele Uuministeli wOondoolopa nIitopolwa otawu kwashilipaleke tuu ngele oondoolopa otadhi gwanitha po omilandu ndhoka tashi uthwa ngele tashi ya komahala goku ekelahi iiyagaya niiyekelwahi yilwe moondoolopa, nokugamenena po woo omidhingoloko.