Omuprima minista a limbililwa konkalo yompumbwe yomihandjo

25 January 2019 | Local News

Saara Kuugongelwa-Amadhila okwa tumu omupeha minista gwelongo Anna Nghipondoka, opo a ye nooskola moshilongo ashihe a tale nkene onkalo yili mooskola sha landula elundululo lyomusindalongo gwondondo onti 10.

Ooskola otadhi popi kutya aanaskola yondondo onti 10 oyo ye na okutalwa tango ngele tagu gandjwa omihandjo mooskola unene dhepangelo, onkene omalelo gooskola otaga kunkililwa opo gaye pondje omilandu dhelongo nokukwashilipaleka kutya aanona oya tulwa mumwe moondunda dhokulala opo ku vule okutaambelwa momihandjo omwaalu omunene gwaanaskola.

Shoka osha hololwa kuNghipondoka sho a talelepo oskola yedhina Andimba Toivo ya Toivo Senior Secondary School mOndangwa.

Etalelepo lyaNghipondoka olya tameke konima owala yomasiku omashona sho oshifokundaneki shoNamibian Sun sha lopota kutya aavali yamwe otaya lundile oskola yAndimba Toivo ya Toivo Senior Secondary School mOndangwa kutya otayi tindile aanona yondondo onti 12 momihandjo, nokugandja oompito dhomihandjo kaanaskola yondondo onti 10 oshowo 11.

Nonando ongaaka omupeha minista okwa popi kutya okwa nyanyukwa noonkondo mokumona kutya oskola ndjoka oya longa oshilonga oshiwanawa sho ya kwashilipaleke kutya konyala aanona ayehe mondondo onti 10 oya mona omihandjo.

Omukuluntuskola poskola ndjoka, Walde Shapaka okwa lombwele oNamibian Sun kutya omanga omulandu ngoka inagu tulwa miilonga, oskola ndjoka oya li owala hayi kala naanaskola ya thika po 60 mondondo onti 10 ihe konima sho kwa tulwa miilonga omulandu ngoka omwaalu ngoka ogwa londo pombanda sigo opaanaskola 215.

Okwa popi kutya oskola oyi na aanaskola ya thika pe 1 000 ihe omihandjo dhawo otadhi pumbwa owala okukala naantu ya thika po 650.

Mokati kaanaskola 215, 158 oye li momuhandjo omanga ondondo onti 11 yi na aanaskoka 262 moka ye li 170 ye li momuhandjo. Mondondo onti 12 mu na aanaskola 371, no 210 oye li momuhandjo.

Nghipondoka okwa popi kutya elalakano lye lyokutalela po oskola ndjoka okutala kutya otaya humu ngiini komeho nomusindalongo ngoka omupe gwondondo onti 10, unene kaanaskola mboka haya zi pondje naamboka haya zi momihandjo.

Okwa holola kutya onkalo yaanona taya hiila yoomvula 16 no 17 kayi shi onkalo ombwaanawa, na oyi li omaipulo omanene ku yo molwaashoka aanona mboka aashona.

Okwa popi kutya onkalo ndjoka oyi li omukundu omunene kuyo oshowo komuprima gwoshilongo Saara Kuugongelwa-Amadhila.

Nghipondoka okwa popi kutya okwa kala ta talele po ooskola moshilongo ashihe opo a tale kutya onkalo tayi ende ngiini, unene okutala konkalo yomahala gokuza aanaskola.

Okwa popi kutya nonando oye na oomvula ooshona aanona oyendji ngashiingeyi otaya hiila nale yo yamwe ohaya zi pamwe momahala omashona momalukanda ihe omolwa onkalo yompumbwe yomahala momihandjo dhooskola.

“Aanona 57 yondondo onti 10 kaye li momuhandjo naanona mboka otaya vulu okuninga iihakanwa yomiyonena ngaashi omakwatonkonga. Esiku limwe mombashu kokanona koomvula 16 oshi li sha nika oshiponga noonkondo na inatu hala iinima yoludhi ndoka yi holoke,” Nghipondoka a popi.

Sho omupeha minista sho a talelepo oskola yaAndimba okwa pula natango moondunda dhokulala mu gwedhwe oombete opo aanaskola oyendji ya vule okumona omahala gokuza nonando moondunda moka omuudha nale.

Nonando oskola oyi na oombete itadhi longithwa, oya popi kutya kaye na omatalashe, naNghipondoka okwa pula aavali ya gandje ekwatho lyomatalashe koskola.

ILENI NANDJATO