Omakonaakono goAugust 26 otaga tsikile - Kapofi

11 October 2021 | Local News

JEMIMA BEUKES



OVENDUKA

Ominista yEgameno Frans Kapofi okwa popi kutya omakonaakono taga ningwa omolwa uulingilingi, eyando lyokufuta iishoshela yepangelo neholeko lyoonzo dhiimaliwa ngoka ga tamekwa muMaalitsa mehangano lyedhina August 26 otaga pula komeho. Omakonaakono taga ningwa kopolisi otaga tala koshikako shuule woomvula omulongo na oga katekwa kashona omolwa iiputudhilo yimwe mbyoka tayi ende kashona mokugandja omauyelele ga gwadhwapo momakonaakoo ngoka.

“Ope na oombangi dhoka dha gandja omaumbangi. Otandi kukwashilipaleke mpaka kutya omikanda dhoombangi odha gandjwa nale. Ondahala okwiitaala kutya omolwa uuwanawa waayehe omakonaakono ngaka oga pumbwa okuningwa momukalo omuwanawa. Shika oshipotha sha simana nopolisi otayi kongo omaumbangi.”

Momwedhi Apilili opolisi oya koleke kutya oshikondo shawo shiimbuluma yopangeshefa osha tameke omakonaakono mehangano ndyoka konima sho uuministeli wegameno wa patulula oshipotha omolwa uulingilingi neholeko lyoonzo dhiimaliwa yongushu yoomiliyona 200.

Omakonaakono ngoka oga landula sho mayola gwaVenduka, Job Amupanda a popi kutya ominista nale yegameno, Peter Vilho, okwa kutha oshimaliwa shoomiliyona 200 okuza kuuministeli okutula mehangano lyoAugust 26 pwaahena elandulo lyomilando dhepangelo.

[email protected]