Omahogololo mOshakati East ga pita ko

10 July 2019 | Local News

Omunambelewa gwomahogololo moshikandjohogololo Oshakati East, mokakomisi koElectoral Commission of Namibia (ECN), Efraim Iiyambo, okwa popi kutya oongundu dhopolotika dha yooloka odha holola ohokwe okushangitha aakalelipo yawo momahogololo ngoka guukansela.

Esiku lyahugunina lyokwiishangitha Omaandaha goshiwike shika twa taalela. Oongundu ngaashi Swapo, Popular Democratic Movement (PDM), All People's Party oshowo omuhogololwa gumwe iithikamena oya koleke koNamibian Sun kutya otaya ka kutha ombinga momahogololo ngoka taga ningwa momasiku 24 gaAguste nuumvo. Omahogololo ngoka otaga ningwa sha landula eso lyakansela gwoshikandjohogololo shoka, Lotto Kuushomwa, ngoka a hulitha momasiku 27 gaMei nuumvo. Pethimbo lyomaishaingitho gomahogololo ga gwedhwa po ngoka ga ningwa omwedhi gwa piti, aantu ya thika pe 1 441 oyiishangitha omanga aantu yeli po 17 000 yeli nale momusholondondo gwaahogololi moshikandjohogololo Oshakati East, pahapu dhaIyambo.

Pau Pau Kathanga gwoAffirmative Repositioning (AR) movement okwa popi kutya oya shangitha nale omuhogololwa iithikamena, Fiina Kuutondokwa. Kuutondokwa omunamimvo 41 okwa za momukunda Iikuku na oha longele omina muumbugantu woshilongo. Kuutondokwa okwa koleka kutya ota kutha ombinga momahogololo ngoka onga omuhogololwa iithikamena.

Omukwatakanithi gwongundu yoSwapo moshitopolwa shaShana, Samwel Nelongo okwa popi kutya omunamimvo 64, Abner Shikongo okwa hogololwa opo a ninge omuhogololwa gwongundu yoSwapo. Okwa popi kutya Shikongo okuli omulongiskola keithano na okwa li woo omukomeho gwelongo.

“Shikongo okwa kala oshilyo shongundu yoSwapo uule wethimbo ele na okwali omukwatakanithi gwongundu moshitayi sha Amutenya Gwangwali. Okwa longa woo onga oshilyo shokomitiye yomayambulepo moshikandjohogololo pethimbo lyelelo lyaKuushomwa. Otwe mwiinekela kutya otaka e ta omayambulepo ngoka ga pumbiwa moshikandjohogololo,” Nelongo a popi. Ongundu yoAPP oshowo PDM oya popi kutya itaya holola manga omadhina gaaakalelipo yawo.

Ngoka ta longo pehala lyomupresidende gwongundu yoCongress of Democrats (CoD), Elago Amuthenu okwa popi kutya otaya ka kundathana ngele otaya kutha ombinga nenge itaya kutha ombinga momahogololo ngoka. Pethimbo lyomahogololo ngoka ga ningwa momvula yo 2015, mokati kaahogololi 17 630 mboka yiishangitha okukahogolola, aahogololi owala 5 881 yahogolola moshikandjohogololo Oshakati East. Kuushomwa okwa li a sindana omahogololo ngoka nomawi 5 559 a landulwa kuDaniel Andreas gwoPDM ngoka a zimo nomawi 241.

Natangwe Shiwayu gwoRally for Democracy and Progress (RDP) okwa zi mo nomawi 81.

ILENI NANDJATO