Omahogololo gelelo lyaShakati ga kalekwa

Omananathano kombinga yoompito dhelelo lyaShakati

05 December 2019 | Local News

Omahogololo ngoa oga kalekwa omanga aakuthimbinga yaadhika ya gongala nale pehala mpoka pwa li pe na okuningilwa omahogololo ngoka.

Ngoka ta longo pehala lyomunambelewa omukuluntu melelo lyondoolopa yaShakati, Kornelius Kapolo okwa gandja ombili kaakuthimbinga ta popi kutya eundulilo komeho ndyoka olya ningwa shaaheli pakondolola yawo.

Kapolo okwa lombwele iikundaneki kutya inaya vule we okupula komeho nomahogololo ngoka molwaashoka okwa li ku na omutumba koombelewa dhoSwapo moshitopolwa nomahogololo gawo ogali shimwe shomiikundathanwa yoshigongi shoka.

Oshifokundaneki shoNamibian Sun osha nothelwako kutya ope na omakondjithathano kutya olye ta kutha po ompito yuumayola, uunashipundi welelo oshowo ngoka ta pingenepo Katrina Shimbulu.

Shimbulu okwiikutha miilonga pamwe nomunambelewa omukuluntu gwelelo lyondoolopa yaShakati sha landula sho ya taamba euliko lyawo mOmutumba gwoPashigwana kokatekete kongundu yoSwapo, ihe oya ndopa oku shi pondola okukala momusholondondo gwaaulikwa o 63 mboka ngashiingey taya yi moPaliamende, kongundu yoSwapo.

Onzo yomeni oya holola kutya konima sho yiikutha miilonga muKotomba, elelo olya taambako owala eikutho lyawo miilonga mEttano lya piti nonando kasha li oshitopolwa shiikundathanwa yomutumba ngoka gwa ningwa.

Werner Iita okwa lopotwa iikutha miilonga momasiku 17 gaKotomba ihe omanga iniikutha miilonga okwa li nale mefudho lyokuninga omahwahwameko, ndyoka lya hulu mEtitano lya piti.

“Shoka shi li po okutya onakuyiwa yaanambelewa mboka yaali inayi tokolwa natango. Ope na omananathano ogendji kombinga kutya olye ta kutha po ompito yini, nomuntu ngoka a landula Shimbulu momusholondondo gwoSwapo, ina tulwa natango miilonga papangelo opo a vule okuya pehala lyaShimbulu. Kapolo naye okwa li owala ta longo sigo omEtitano onkene omutumba gwelelo ngoka gwa ningwa mEtitano ogwa lelepeke ethimbo lye lyokulonga pehala lyomunambelewa omukuluntu,” onzo ya holola.

Kansela gwongundu yoPDM, Linus Tobias okwa holola okuuva nayi kwe, ta popi kutya ina tseyithilwa pethimbo kutya omutumba ngoka ogwa kalekwa.

“Sho nda thiki mpaka opo owala nda lombwelwa kutya omutumba oguundulilwa komeho. Shoka kashi li pauyuuki molwaashoka shika kashi shi oshikumungu shaSwapo.”

ILENI NANDJATO