Ofamili yoopastoli tayi kongo egameno lyopolisi

14 September 2021 | Local News

KENYA KAMBOWE

KAHENGE

Aakwanezimo yoopastoli yaali mboka yeli mondjeedhililo yopolisi omolwa omaso gaakwanegongalo yawo yatatatu oshiwike sha piti, otaya kongo egameno okuza kopolisi.

Oya mbandapala kutya aakwanezimo yoonakusa otaya ka ninga iikonene omolwa shoka sha holokapo. Shoka osha kolekwa kukomanda gwOpolisi yaKavango West, Josephat Abel, pomutumba gwa ningwa niikundaneki moNkurenkuru.

Abel okwa popi kutya aakwanezimo mboka oya ka konga ekwatho omolwa omatilitho taga ningwa kaakwanezimo yoonakusa kutya oya hala okufutwa.

Elia Ihemba (36) oshowo Engelberth Hamutenya (25) oya holoka mompangu taya tamanekelwa iipotha itatu yedhipago oshowo oshipotha oshitine shonkambadhala yedhipago.

Oya tindilwa omboloha sho ya holoka mompangu, noshipotha shawo osha undulilwa komasiku 12 gaJanuari omvula twa taalela.

Oonakusa oya tumbulwa komadhina kutya oNtamba Evaristus Ndumba (37), Nangombe Robertha Ndumba (45) oshowo Kapango Hilka Simbaranda (21).

Rosa Ndumba (39) okuli moshipangelo.