Mbumba a hala okatomeno kaRundu ka pwe

02 July 2019 | Agriculture

Omupeha omupresidende, Nangolo Mbumba okwa hala opo okatomeno kaRundu, hoka ka kala taka tungwa okuza omvula yo 2014 opo ka manithwe mbala omanga aanafaalama inaya kanitha iimuna yawo koshikukuta oshinene shoka sha taalela oshilongo.

Mbumba okwa taalela po opoloyeka yetungo lyokatomeno hoka yongushu yoshimaliwa shoomiliyona 123 ndjoka kwa tegelelwa yi kale ya manithwa muNovemba nuumvo, ihe uule wethimbo opoloyeka ndjoka ya kala tayi longwa.

“Otwa taalela oshikukuta nuumvo; aanafaalama oya hala okulanditho po iimuna yawo opo yiimonene iiyemo. Otu li muJuni ngashiingeyi na otatu ka taalela Juli naAguste oshowo Sepetemba niimuna yomoshitopolwa shaKavango East otayi monika nawa komalutu, ihe ngele otwa tegelele sigo oNovemba iimuna otayi ka adhika monkalo ombwiinayi.”

Oomwedhi ndatu dha piti ngashiingeyi konima sho omunambelewa melelo lyuuministeli wuunamapya, Percy Misika a lombwele oshifokundaneki shoNamibian Sun kutya emanitho lyokatomeno hoka oli li pankatu ya hugunina.

Omundohotola gwiimuna moshitopolwa shaKavango east, Ludgerus Amushila okwa lombwele iikundaneki kutya okatomeno hoka oka pwa okutungwa noopresenda 75, noshimaliwa shoomiliyona 78 shomoomiiyona 123 dhoka dha nuninwa okutunga okatomeno hoka osha longithwa.

Opoloyeka ndjoka oya li ya nuninwa oomiliyona 110.

Sho a pulwa kutya osha ende ngiini oshimaliwa shi londe pombanda noomiliyona 13, Amushila okwa popi kutya ina pyakudhukwa okupopya kombinga yomatompelo.

Uuna ka tameke okulonga okatomeno hoka otaka ka vulu okutomwenwa oongombe 100 mesiku.

Monena aanafaalama ohaya landithile iimuna yawo muutomeno wopakathimbo waMeatco mboka hawu ningilwa mokamba yomanga yiimuna moMatumbo Ribebe, oshinano shookilometa 60 okuya muumbugantu waRundu.

Okatomeno hoka ohaka tomenwa oongombe 90 momwedhi.

Pahapu dhomunashipundi gwoKavango East Regional Farmers Union (KERFU) Adolf Muremi, ope na oongombe dhi li po 900 dhoka dhategelelwa okutomwa mokatomeno hoka kopakathimbo.

Muremi okwa kala uule woomvula odhindji ta pula opo okatomeno hoka ka manithwe.

KENYA KAMBOWE