Iiponga mehuliloshiwike lyapaasa ya shuna pevi

26 April 2019 | Accidents

Omwaalu gwiiponga yomoondjila mbyoka ya lopotwa pethimbo lyehuliloshiwike ele lyapaasa, ogwa shuna pevi okuyeleka noomvula dha piti pethimbo lya faathana. Iiponga yi li 44 oya lopotwa pethimbo ndyoka okuyeleka niiponga yi li 68 ya lopotwa mo 2018 oshowo 64 ya lopotwa momvula yo 2017.

Noonando ongaaka omwaalu gwaantu ya hulithile miiponga ogwa londa pombanda okuyelele nomwaalu gwaantu ya hulithile miiponga ya holoka omvula ya piti mopaasa.

Nuumvo aantu yahetatu oya hulithila miiponga mbyoka omanga omvula ya piti mwa hulithila aantu yatano.

Omwaalu ngoka oga kalela po eshuno pevi lyomaso gaantu ya hulithile miiponga mbyoka pokati komvula yo 2017 no 2018.

Momvula yo 2017 omalelo goondjila oga lopota omaso ge li po 18 onga oshizemo shiiponga yomoondjila mehuliloshiwike lyapaasa, okuyeleka nomaso gatano ngoka ga lopotwa omvula ya piti.

Omwaalu gwaantu mboka yeehamekelwa miiponga mopaasa nuumvo ogu li paantu 99 omanga omvula ya piti kwa lopotwa aantu 98 momvula yo 2017 okwa lopotwa aantu yeli pe 177.

Omwaalu gwiiponga ya holoka pethimbo lyopaasa nuumvo okwa dhidhilikwa gwa shuna pevi okuyeleka niiponga mbyoka ya holoka muule woomvula ntano dha piti, nehangano lyoMotor Vehicle Accident (MVA) Fund olya lopota iiponga yi li 81 momvula yo 2016, 64 mo 2017, 68 mo 2018 oshowo 44 nuumvo.

Metitano, Titus Makili (51) okwa hulitha konima sho oshiyenditho she sha gu nokugalangata na osha yaka omulilo. Opolisi mEtiyali oya holola kutya oshiponga osha ningilwa oshinano shookilometab 60 okuya mOtjiwarongo, konima sho omunamimvo 49 a nyengwa okukondolola oshiyenditho moka mwa li Makili nayakwawo yalwe yatano mwa kwatelwa omukuluntu oshowo aanona yane.

Aafaalelwa yalwe oya hupu moshiponga shoka.

Molyomakaya, Lukas Nambwanga (40), oshilyo shoNamibian Defence Force osha hulitha sho ohauto yiikoto iyali ndjoka a li ta hingi ya gu. Nambwanga, okamona kokamati koomvula mbali, Olavi Namgwanga, oshowo kuume ke, Theresia Alfeus (31) oya hulithile woo moshiponga shoka sha ningilwa mondjila yomamanya popepi nOngwediva. Aafaalelwa yalwe yatatu mboka ya li mohauto pethimbo lyoshiponga oya taambelwa moshipangelo sho ya ehamekelwa moshiponga.

Aupaki Kaemupe (31) okwa hulitha mOlyomakaya konima sho a lyatwa kohauto popepi noKamanjab.

Kaemupe okwa taambelwa moshipangelo ihe ina hupa, opolisi otayi konaakona nokukonga nakuhinga ohauto ndjoka ye mu pumu.

Aakwashigwana yaSouth Afrika yatano oya ehamekwa kashona sho ohauto moka ya li ya gu kondjila yomamanya pokati kaMaltahöhe oshowo Helmeringshausen mEtitano. Ehuliloshiwike lyapaasa olya tetekelwa kehwahwameko enene lyegameno lyomoondjila, tali ithanwa Easter. Public Passenger Transport Campaign, ndyoka lya ningwa kaakuthimbinga ya yooloka mwakwatelwa opolisi, MVA Fund omangano gomalweendo, omahangano gopaumwene naakuthimbinga.

Ehwahwameko ndyoka olya nuninwa okuya moshipala iiponga yomoondjila. Momukanda gwiikundaneki moka a pula aahingi ya hinge nawa, omunambelewa gwoMVA Fund, Surihe Gaomas-Guchu, okwa pula aafaalelwa miiyenditho yaayehe ya popye omolwa egameno lyawo molwaashoka oye li moshiponga sheso nenge ehameko uuna taya idhidhimikile okuhingwa okuwinayi.

Okwa popi kutya ehangano lyawo oli li momalimbililo omolwa ekanitho lyoomwenyo odhindji oshowo omayehameko omolwa iiponga tayi ningwa kiiyenditho yomalweendo gaayehe.



JANA-MARI SMITH