Iimaliwa mbyoka ya yekwa omunangeshefa mOndangwa inayi monika natango

22 July 2019 | Crime

Kape na ngoka a tulwa miipandeko shi na sha nomuyeka kwahomatiwa ngoka gwa ningwa ongula yOmaandaha mOndangwa.

Opolisi mOshitopolwa shaShana oya lopota kutya omunangeshefa gwoomvula 32 omukiintu, okwa yekwa iimaliwa ya thika pooN$60 000 sha ningilwa komeho yombaanga mOluno mOndangwa omanga a li tayi a ka pungule iimaliwa mbyoka kombaanga. Omukiintu ngoka okwa hinga okuza pehala lyongeshefa ye mOnethindi mondoolopa yaNiipa.

“Sho a kankameke oshiyenditho she mehala lyomathikameno komeho yombaanga, aafekewa yaali oya nuka okuza mohauto yoToyota Run-X. Oya dhengemo ekende lyohauto ye nokumuulika ombele. Oya kutha po iimaliwa nokuya ontuku nohauto yawo,” omupopiliko gwopolisi yaShana, Warrant Officer Frieda Shikole-Ashiyana a hokolola.

“Omwali aafekelwa yane mohauto ihe kape na ngoka a tulwa miipandeko niimaliwa inayi monika. Omakonaakono gopolisi otaga tsikile.”

Shikole-Ashiyana okwa kunkilile aantu opo kaya humbate omwaalu omunene gwiimaliwa pwaahena egameno. Okwa popi kutya aantu naya pule opolsii yi ya thindikile uuna ya humbata iimaliwa oyindji.

“Ngele omukwashigwana okwe tu pula opo tumukwathele mokumuthindikila uuna a hala okukanana iimaliwa nenge okukapungula iimaliwa, otatu ya kwathele pwaahena uupyakadhi,” Shikole-Ashiyana a popi.

Moshiningwanima shimwe natango, Opolisi yaShana otayi konaakona oshipotha shonkambadhala yedhipago, moka omunamimvo 26, Protasius Kasian a tsuwa nombele yOkapi omolwa okaremote koTV.

Kasian okwa tsuwa montulo na okuli monkalo yanayipala moshipangelo shaShakati. Ofamili yaKasian inayi tseyithilwa natango oshiponga shoka molwaashoka kakushiwike kutya okwa za peni.

Opolisi oya lopota kutya shoka osha ningilwa pondunda yomanwino yedhina Etombe shebeen momukunda Okatha Kiingondjo. Omufekelwa Paulus Reinhold (24), okwa tulwa miipandeko na okwa holoka mompangulilo yamangestrata gwaShakati.

ILENI NANDJATO