Helao Nafidi ta tembudha etoto lye lyiiyagaya

09 August 2019 | Local News

Elelo lyondoolopa yaHelao Nafidi otali pangele okutembudha etoto lyawo lyiiyagaya konima sho aakwashigwana ya nyenyeta omolwa olwithi ndoka halu zi mehala ndyoka uuna taku hwikwa iiyagaya.

Mayola gwondoolopa ndjoka, Eliaser Nghipangelwa, okwa popi kutya elelo olya tokola okutembudha etoto ndyoka opo ya kandule po uupyakadhi mboka.Okwa popi kutya elelo olya li hali hwikile iiyagaya ketoto ndyoka ihe olya hulitha po omukalo ngoka konima sho aakwashigwana ya tameke okunyenyeta. Etoto ndyoka otali adhika mOmafo netoto epe otaku pangelwa tali kala mEngela.

Gumwe gwomaakwashigwana mboka ya gumwa, Ndahafa Natanael okwa popi kutya olwithi olwa ninga uupyakadhi ngashiingeyi.

“Ihatu kotha we nawa omolwa olwithi ndoka, na otu na uutile kutya otalu vulu okutweetela omikithi,” Natanael a popi.

Nghipangelwa okwa holola woo okuuva nayi kwe omolwa aakwashigwana mboka inaya hala okuthiga po ehala mpoka elelo lya hala okutula ngashiingeyi etoto.

Okwa popi kutya elelo itali vulu okutula po etoto ngele aakwashigwana inaya hala okuza po pehala mpoka, ta tsikile kutya elelo natango otali tsikile nokuuvitha ko aakwashigwana mboka.

NAMPA