Hangame nda e ta evundakao moRundu - Shaningwa

10 May 2019 | Local News

Amushanga gwongundu yoSwapo, Sophia Shaningwa okwa ekelehi omapopyo ngoka taga ningwa kutya oye omutse omunene mevundakano ndyoka li li melelo lyondoolopa yaRundu, ta popi kutya ye okwa li a lombwelwa pashigwana opo iikaleke kokule noshikumungu shomondoolopa ndjoka.

Oshifo shoNamibian Sun sha ningi ekwatathano naShaningwa sha landula sho Omunambelewa Omukuluntu gwElelo lyaRundu, Sikongo Haihambo a tseyitha eikutho lye miilonga na okwa tegelela a ka kale a thiga po iilonga muule woomwedhi mbali dhi li komeho omolwa omananathano ngoka ge li melelo ndyoka.

Omutoolinkundana gwoshifo shika okwa li a hala okuuva kutya Swapo ota ningi po shike opo a tulepo elandulathano melelo ndyoka, unene mokati kookansela yongundu mboka taya lele elelo lyondoolopa ndjoka.

Monena elelo lyondoolopa yaRundu kali na okomitiye yelelo ndjoka tayi kwatele komeho elelo lyondoolopa.

Natango omakondjithathano melelo ndyoka pokati kookansela yoSwapo oga yi pombanda moka elelo lyongundu paitopolwa lya nyengwa okukandula po uupyakadhi na ngashiingeyi ombelewa owala yaShaningwa oshowo uuministeli womalelo giitopolwa noondoolopa oyo taya vulu okuhulitha po omananathano ngoka.

Nonando ongaaka sho owala Shaningwa uuvu edhina lyondoolopa yaRundu, okwa geye ta popi kutya ye ke na sha niikumungu yaRundu, na ina hala we okuningwa naye ekwatathano ta pulwa elelo lyondoolopa ndjoka.

“Otandi dhilaadhila kutya owu na owino kutya konyala ndi falwe kompangu omolwa iinima mbyoka. Kandi shi kutya omolwashike aantu taya piyaganekendje niinima yoludhi ndoka,” Shaningwa a popi.

“Inandi hala omuntu ta dhengelendje ongodhi ta pulandje iikumungu mbyoka, aantu ne ethiindje. Oya popi kutya itaya ka landula omalombwelo gaSwapo ihe omitenya nuusiku aaantu oya landula ndje owala taya pulandje. Omalombwelo gandje oga ethiwa nale.”

Shaningwa okwa popi kutya aantu ya pumbwa okuhulitha po okulongitha edhina lye nokuungaunga niikumungu yawo. Shaningwa okwa zimine kutya aantu mboka taya mono iihuna omolwa omakondjithathano ngoka ge li melelo lyondoolopa ndjoka, aakwashigwana mboka ya patelwa pondje ngashiingeyi ngele tashi ya komayakulo.

Okwa gwedhwa po kutya ina tongola elelo lyontumba sho a li ominista yomayambulepo goondoolopa niitopolwa na ke na omatompelo gokushininga ngashiingeyi pompito mpoka e li.

Oonkambadhala dha ningwa okumona ominista yomalelo goondoolopa ngashiingeyi, Peya Mushelenga, odha hulile muunyengwi, sho ongodhi ye inayi yamukulwa.

KENYA KAMBOWE