Elanditho lyomayego goondjamba lya tindwa

Kwa hololwa uutile wetulo moshiponga egameno lyoondjamba

27 August 2019 | Tourism

Iilongo ngaashi Namibia, Botswana, oshowo Zimbabwe oya pula opo yi pitikwe yi landithe po omayego goondjamba ngoka geli momake gomapangelo gawo, ihe eindilo ndyoka oya tindwa kiilongo yi li 101, na iilongo owala 23 ya zimine.

Iilongo oya tindi kutya shoka otashi ka tula moshiponga egameno lyoondjamba menenevi, nokupopya kutya eindiko lyelanditho lyomayego goondjamba osho owala tashi vulu okukalekapo egameno lyuudha.

Pauyelele wa pitithwa molopota yoElephant Trade information System, Namibia okuli egumbo kuukongo woomageyo goondjamba waaheli paveta, nomomvula yo 2016 olopota tayi ithanwa International Union for Conservation of Nature African Elephant Status Report oya lopota e yo pombanda muukongo mboka okuza momvula yo 2006 moshitopolwa shaZambezi.

Namibia omathimbo ga piti okwa holola omaipulo ge omolwa egameno, sho e na omwaalu omunene gwomayego ngoka, na okwa holola kutya andola elandithepo lyomayego ngoka otali vulu okweetela oshilongo oshimaliwa sha thika poomiliyona 125, ndhoka tadhi vulu okulongithwa miikonga yegameno lyoondjamba neyo moshipala uukongo mboka inawu pitikwa.

Omvula ya piti uuministeli womidhingoloko owa holola kutya Namibia oku na oomayego gondjamba geli pookg 69 391.71kg ( ootona 69.4) gongushu yoomiliyona 125.48.

Mootona dhoka 69.4, ootona dhi li 29.9 odhomayego ngoka ga monika paveta, omanga ootona 39.4 dhomayego ngoka ga monika shaaheli paveta.

Kenya oshowo iilongo yilwe ya Africa oya tindi omaindilo okukutha po oondjindikila dhelanditho lyomayego goondjamba paveta , taya popi kutya shoka otashi ka tula pombanda ompumbwe yomayego ngoka, nokuhwahwameka uukongo womayego ngoka waaheli paveta.

Ongongahangano yoAfrican Elephant Coalition, ya kalela po iilongo yaAfrica yi li 32 oya tindi omaindilo ngoka.

Zambia naye okwa kaleke oompangela dhe ookulanditha po omayego ge goondjamba ngoka e na. Oondjamba adhihe dhaAfrica odha li dha tulwa momusholondondo momvula yo 1980 ihe egameno lyadho olya nkundipala momvula yo 1997 oshowo no 2000 sho omwaalu gwoondjamba moBotswana, Namibia, South Africa oshowo Zimbabwe gwa tulwa pevi momusholondondo Appendix II, okupitika elanditho lyomayego goondjamba moJapan naChina.

Etokolo ndyoka lya ningwa ngashiingeyi, itaku pitikwa elanditho lyomayego goondjamba.



ELLANIE SMIT