Agribank ta futitha omunangeshefa oomiliyona 50

27 July 2020 | Local News

KENYA KAMBOWE

RUNDU



Omunangeshefa nomunafaalama a tseyika nawa, Tulio van der Merwe Parreira okuli pokumbangolota ngele oshipotha shoka a tulilwa mo kombanga yoAgribank, shoomiliyona omi 50 osha piti.

Parreira (61) oku na oongeshefa moRundu na okwa kala ta hiila oMusese green scheme moKavango West uule woomvula 25 dha piti.

Kuyele nuumvo ombaanga yoAgribank oya mOmpangu yoPombanda yaVenduka oya ningi eindilo sha landula sho ongeshefa yoKillarney Pty Ltd, moka Parreira oye awike mwene gwawo ya ndopa okufuta omukuli, sha etitha a pewe uunzapo woondjo inadhi futwa.

Oondokumende dhompangu odha ulike kutya Killarney okwa pewa oshimaliwa shooN$37 591 600 koAgribank muSeptemba gwo2015, oomiliyona dhoka o 37 odha nuninwa okufuta ko oongunga dhaStandard Bank, omanga oshimaliwa shooN$560 000 oshokufuta egumbo noshimaliwa shooN$31 600 oshiifuta yoomayalulo gegumbo.

Omukuli ngoka tagu futwa uule woomvula 15 oga gandjwa kiiholela yoopresenda 8, niifuta yotango oya li yi na okufutwa konima yoomwedhi o 12 sho omukuli gwa gandjwa.

Killarney okwa longitha egumbo lyonomola 1324 moRundu, Extension 4 onga ekwatelepo lyomukuli.

Pandokumende dha shangwa kaanaveta ya Agribank', Killarney okwa yi pondje etsokumwe lyawo sho a ndopa okufuta omukuli ngoka momasiku 31 gaMaalitsa mo 2017.

Momasiku 12 gaDesemba 2019 omukalelipo gwopaveta gwaAgribank, Charles Visser okuza koENSafrica okwa shangele Killarney omukanda te mu tseyithile kutya ehangano lye oli na omukuli gwaantu gwooN$9 672 114.66, gu li konima.

Killarney okwa li a pewa omasiku 14 a fute omukuli ngoka nenge a taalele oonkantu dhopaveta.

Momasiku ga8 Januari, omunambelewa gwochief financial officer gwoAgribank, Louis du Toit okwa gandja uunzapo woondjo kuKillarney. Shoka osha landulwa nduno keindilo lyOmpangu yoPombanda ndyoka lya tulwa mo opo Killarney a fute oshimaliwa shombaanga shooN$49 149 885 shoka e na.

Momasiku 17 Februari, okupitila muBarend van der Merwe gwoVan der Merwe-Greeff-Andima Incorporated, Killarney okwa yamukula keindilo lyompangu, e li ompinge noonkatu dhoka dha katukwa kombaanga.

Parreira momukanda gwe gwompangu ngoka a shaina momasiku ga 4 gaJuly okwa popi kutya eindilo lyombaanga nali tindwe molwaashoka ina mona ethimbo lya gwana opo a koleke omwaalu ngoka gwa popiwa kombaanga.

Okwa popi kutya Du Toit ina gana neshaino lye kali po ponzapo ndjoka a gandja.

Epulakeno lyoshipothas hoka olya undulilwa komasiku ga 3 gaSepetemba kOmupanguli mOmpangu yoPombanda, Marlene Tommasi.

Omvula ya piti muKotomba, oshifokundaneki shoNamibian Sun osha lopota kutya iiyemo yaParreira oya gumwa keponokelo lyoshikunino she koondjamba oshowo omapuka ngoka ga ponokele iimeno ye mo 2017.







Pethimbo ndyoka omunangeshefa ngoka okwa popi kutya eponokelo ndyoka lya ningwa koondjamba olya etitha ekanitho lyoomiliyona 12, omanga omapuka ga etitha ekanitho lyoomiliyona N$40.







Omaponokelo ngoka oga etitha a ye monkalo yokumbaangolota, omunangehefa ngoka a popi.