AaNdangwa ye na oondjo dha thika poomiliyona 51

12 August 2019 | Local News

Elelo lyondoolopa yaNdangwa otali pangele okulikola oshimaliwa sha thika poomiliyona 51 dhoka dhi niwe oongunga kaakaalimo yomondoolopa ndjoka onga iifuta yomayakulo gamuni.

Aakwashigwana ya thika po 8 077 mboka ye na ooakaunda nelelo lyondoolopa ndjoka, oye na oongunga dhelelo dhi li poomiliyona 50.77.

Pahapu dhomunambelewa omupopiliko gwondoolopa ndjoka, Petrina Shitalangaho, elelo otali ka gandja oshinakugwanithwa shokugongelako oongunga ndhoka kehangano lyokukonga ko oomikuli.

“Elelo olya kambadhala okuya mekwatathano naakwashigwana mboka paku ya nyolela oombaapila ihe inaya futa oongunga dhawo. Ngashiingeyi otwa thigwa katu na we shoka tatu vulu okuninga ihe okufala mboka ye na omikuli kehangano lyokugongela ko omikuli. Elelo olyiikokelela miimaliwa mbika mokugandja omayakulo mondoolopa.”

“Ooakaunda dhoka tadhi ka pewa ehangano lyokukonga ko omikuli, oodhoka dhili konima niifuta uule womasiku 120 na oye na oongunga dhelelo lyondoolopa dha thika poomiliyona 36. Otaku kalandula ooakaunda dhili pe 1 765 dhaamboka ye na ye na oongunga inadhi futwa lyopokuya pomasiku 120 na oye na oongunga dhelelo lyondoolopa dha thika poomiliyona 16.5.”

Shitalangaho okwa popi kutya aakwashigwana natango otaya vulu okuninga ekwatathano nelelo nokutulapo omulandu gwokufuta opo ya yande okugandjwa komahangano gokukonga ko omikuli, naamboka ye na oondjo omwakwatelwa oohandimwe ooyene yomagumbo, aanangeshefa, iikondo yepangelo oshowo iiputudhilo yepangelo.

Okwa popi kutya iiyemo mbyoka haya mono okuza kuuministeli weyambulepo lyoondoolopa niitopolwa inayi gwana na oyiikolela miifuta mbyoka opo ya vule okupulitha komeho noopoloyeka mondoolopa, nokutsikila okugandja omayakulo kaakalimo yomondoolopa.

ILENI NANDJATO

caption