A zi komulandithi gwomomapandaanda nokuninga omunafaalama

25 February 2021 | Local News

OMUTOOLINKUNDANA GWOMENI

OVENDUKA

Ø Ngashiingeyi a taalela ompumbwe yomalanditho

Petameko lyomvula yo 2003 omanga ta landitha omatama mOutapi, Amutenya okwa tsakanene nakastoma gumwe ngoka e mu tsu omukumo opo a ye mongeshefa yoshikunino.

Omolwa ompumbwe yontseyo mongeshefa yoludhi ndoka, Amutenya okwa kala ta kaleke edhilaadhilo ndyoka uule woomwedhi dhontumba.

“Konima yoomwedhi sho nda tsakanene nakastoma ngoka, omadhilaadhilo gopaali oga kala tage ya momutse gwandje: kandi na uunongo nenge ndi pule komeho ngame ndi kambadhale. Ondiitsu omukumo kutya ngele yamwe otaye shi ningi nena nangame otandi shi vulu,” Amutenya a popi.

Pauyele waAgribank okwa yi kugumwe gwomaanafaalama momudhingoloko gwaLushandja moshitopolwa shaMusati ngoka e mu landitha oshitopolwa shevi popepi nomeya, mpoka a ningi nduno okakunino ke.

“Sho nda ningi oshikunino shandje, onda kala nedhilaadhilo lyokwaahaninga lela iimaliwa molwaashoka ka ndali ndi na iimaliwa sho nda tameke. Iimaliwa mbyoka ndali ndi na ya zi mongeshefa yandje yokulanditha omayapela oyo nda longitha po mokulanda evi nombuto yomatama.”

Okwa kunkilile aanafaalama opo kaya ye mongeshefa ndjoka nenenedhilaadhilo lyokuninga iimaliwa oyindji ihe okukoka pangeshefa.

Konima sho a kala ta kambadhala okukuna omatama na okwa ndopa, okwa tokola a talelepo opoloyeka yEtunda Green Scheme irrigation project, hoka a tsakanene namenindjela ngoka e mu pe omayele kombinga yoshikunino.

Okwa popi kutya konima sho a tameke ta tula miilonga omayele ngoka a pewa kEtunda okwa mono elunduluko sho omatama ge ga tameke taga koko nawa, na okwa kala ta ningi iimaliwa uuna e ga fala momalanditho.

Konima yethimbo okwa ka konga ekwatho lyoshimaliwa okuza koAgribank okupitila moshitayi shaShakati.

Okwa pondola okulanda oopomba mbali, embakumbaku oshowo ominino dhokutekela nokulanda woo oshitopolwa shimwe shevi.

Okwa tameke nduno ta kunu iikunwa ya yoolola, okuza kepungu, omatama, oonyanga, oonawamundesha oshowo oomboga.

Momvula yo 2017 okwa sindana epapa tali ithanwa ‘Namibia’s best large-scale horticulture producer of the year award’ lya gandjwa koNamibia Agronomic Board.

Amutenya okwa popi kutya konima sho a futu omukuli gwaAgribank gwotango okwa ka konga natango omukuli omutiyali na okwa landa ofaalama momudhingoloko gwaGrootfotein moka a kala ta tekula woo iimuna.

Amutenya okwa popi kuya uupyakadhi mboka e na ngashiingeyi ompumbwe yokulanditha iikunwa ye oshowo omapuka ngoka taga ponokele iikunwa ye.

Okwa pula epangelo li ya kongele omalandithilo oshoowo iikondo yepangelo yi kale tayi landa okuza kaanafaalama.

Amutenya oku na aaniilonga 15 nopethimbo lyeteyo oha kutu aaniilonga yopakathimbo ye li 80.