Oshigwana shomomukunda otashi indile aakuthimbinga, aanafaalama noongeshefa, naaiyambi ya kwathele sigo ya gwanitha po elalakaneno lyo-N$100 000.

Aakalimo yomomukunda Okapya mOshitopolwa shaMusati otaya longele kumwe mokudhika okapale komaudhano komomukunda opo ya gandje ehala lya patuluka koosipana dhomoshitopolwa dhokuningila omaidheulo nomathigathano.

Moonkundathana noNetwork Media Hub, Negonya Petrus, oshilyo shokomitiyelongekidhi, okwa yelitha kutya ondunge ndjika oya dhiladhilwa mo-2025. Ompangela oya kwatela mo okugongela iiniwe yomOkapya nomikunda dhopuushiinda opo ku dhikwe iikwaniipangitho yomaudhano ya gwana. 

“Ota tu lalakanene okugongela N$100 000 okuninga okapale komaudhano ke li pandondo. Pethimbo ndika, oshigwana shomomukunda gwetu ka shi na iikwaniipangitho yomaudhano ya opalela. Otwiikwatelela ashike kokapale komaudhano kaGwakondombolo, moka ha tu futu N$200 kehe ethimbo twa hiile, yo aatali inaya pitikilwa mo,” osho Petrus a popi. 

Okwa tsu omuthindo eitulemo lyokugandja okapale komegumbo moka oosipana tadhi vulu okuyanda iifuta yokweenda uuna tadhi ka dhana.

Okomitiyelongekidhi oya ndhidhilike kutya aakalimo yomomukunda oya gandja po nale lwopo-N$7 000 taya lalakanene elalakaneno ndika. Kakele kaashoka, Kansela gwOshikandjohogololo shaShikuku, Petrus Nambinga, okwa uvaneke okugandja omagano go-N$1 000 omwedhi kehe okuyambidhidha opoloyeka ndjika sigo otayi manithwa okutungwa.

“Onda hala okwaandjakaneka uuyelele kutya ookansela oye na ompito ya faathana yokuhumbula po iitopolwa yawo,” Nambinga osho a tseyitha. 

Okwa koleke kutya opoloyeka otayi tulwa miilonga paikakothimbo. “Oshikako shotango otashi ka kwatela mo edhiko lyodhalate yongandjo, etungo lyiikwaniipangitho yomauyogoki, nedhiko lyoopaala dhookoola, tashi pitike osipana dhi tameke okulongitha okapale komaudhano,” osho a gwedha po. 

Nonando okutunga inaku tameka natango, okomitiyelongekidhi oyi na etegameno ewanawa kutya iilonga otayi ka tameka manga omumvo nguka inaagu pwa. “Itatu vulu okukala naadhani momukunda gwetu itatu ya kwathele. Ngele otwa tegelele omuntu gulwe e tu tungile okapale komaudhano, tashi vulika shi kale inaashi ningwa,” Nambinga osho a popi. 

Okapya oka simanekwa naadhani oyendji yomoosipana dhomaudhano getanga lyokoompadhi dhaakiintu, dhaalumentu, netanga lyomokambamba, ashike aadhani paife kaye na ehala lyoopalela lyokuhumitha komeho uunkulungu wawo. 

Monica Kuutondoka, omudhani gwetanga lyomokambamba gwomomukunda, okwa taamba ko ondunge ndjika. “Okukala nehala ndika momukunda gwetu otashi ka tsa aagundjuka oyendji omukumo yi itule mo momaudhano pehala lyokukutha ombinga miilonga yiimbuluma. Otashi ka eta wo oompito koongeshefa dhomoshitopolwa dhi hume komeho mokudhika ootenda dhomalandithilo mesiku lyomaudhano,” osho a popi.

Kuutondoka okwa tsu omuthindo pesimano lyokutula ehumokomeho lyomiitopolwa yokuushayi pambelewa opo ku zulwe iipewa kwatela po aagundjuka ya kale momikunda.

Omanga ngeyi, okomitiyelongekidhi otayi gongele iimaliwa yokulanda oopaala dhomaudhano hadhi  dhikuluka konima sho iikwaniipangitho yawo ya yakelwe po, notaya tsikile okukonga iimaliwa yokulanda odhalate yongandjo.

Oshigwana shomomukunda otashi indile aakuthimbinga, aanafaalama noongeshefa, naaiyambi ya kwathele sigo ya gwanitha po elalakaneno lyo-N$100 000.

Ya tolokwa ku: Gottrieb Nambahu([email protected])