Ezimo lya tindi okanona konima yiizemo yuukwatya wopambinzi

Okanona komoomvula ne otaku fekelwa ka tindwa kezimo lyomulumentu ngoka yina ta popi kutya oye he, konima sho iizemo yomakonakono guukwatya wopambinzi ngoka ga ningwa konima sho omulumentu ngoka a hulitha moshiponga shohauto ya ulike kutya ye haye he gwokanona hoka. 

Yina yokanona, Melani Matheus (28), ngashingeyi ota pataneke omukalo ngoka omakonakono ga ningwa, omanga aakwanezimo yomulumentu ngoka taya popi kutya oompata dhomomahala gomanwino ndhoka dha li dha holoka pokati komumwayinamati ngoka a hulitha naMatheus odha li nale dha eta omalimbililo kezimo kombinga yomapambathano gomulumentu nokanona manga ina hulitha. 

Matheus, omuvalele gwomomukunda Oshaandja moshitopolwa shaShana, okwa lombwele oshifokundaneki shoNamibian Sun kutya Fanuel Henock, omulumentu ngoka ta ti kutya oye he yomwanamati, okwa hulithile moshiponga shohauto momasiku omu-17 gaFebuluali.

Ota popi kutya konima yefumviko, aamwayinakiintu yomuholoke gwe ngoka a hulitha, Hendrina Henock naNdilimeke Iikela, oye mu indile opo a zimine omakonakono guukwatya wopambinzi.  

"Kanda li nda uva ko nawa omukalo ngoka gwa longithwa, ihe onda zimine nokushaina omishangwa ndhoka ya li ya pendje," Matheus osho a popi. 

Okwa fekele kutya omayeye gokanona hoka osho wo gaHendrina oga li ga kuthwa, nokwa ka kundanekwa lwanima kutya iizemo oya ulike kutya nakusa ngoka ke shi he gwolela gwokanona hoka. 

Matheus okwa popi kutya ezimo olye ke mu hiya lwanima opo ya kundathane iizemo mbyoka, ihe aakwanezimo ye oye mu lombwele kaaye ko molwashoka kaya li ya popiwa nayo manga omakonakono ngoka inaaga ningwa. 

"Okuza mpono, oya shunithile ndje okanona kandje kaake na onzapo yako yevalo nenge iikutu mbyoka he a li e ka landela, taya popi kutya kakeshi we okanona komezimo lyawo," osho a hapula. 

Onkalathano

Matheus ota popi kutya nakusa okwa li a zimine okanona hoka ongomwana pethimbo lyokukulamwenyo kwe. 

Okwa popi kutya uukuume wawo wopaihole owa tameke momumvo 2022, pethimbo omulumentu ngoka a li e mu pula opo a ye koSiwakopo ya ka ze pamwe. 

Onda ningi etegelelo pethimbo twa li ha tu zi pamwe. Lwanima okwa shunitha ndje kOwambo, ihe okwa li a taamba ko oshinakugwanithwa shetegelelo ndyoka," osho a popi. 

Okwa mono okanona momvula 2023, nonzapo yevalo yokanona oya shangithwa na nakusa onga he yokanona. 

“Momumvo 2024, omumwandje okwa kala naakwanezimo ye molwashoka oya li ye mu taamba ko onga oshitopolwa shezimo lyawo," osho a popi. "Kandi uvite ko kutya omolwashike, ombaadhilila konima sho he a hulitha, opo ya tindi okanona unene tuu ngashingeyi. Kashi li pauyuuki." 

Matheus okwa popi kutya omazimo agehe gaali ngashingeyi oga zimina opo ya ye momakonakono omatiyali guukwatya wopambinzi. 

Okwa ti oya kundanekwa kutya omakonakono guukwatya wopambinzi kOshitopolwa shOmakonakono gUunamiti muNamibia (NIP) mOshakati otaga ka pula iimaliwa yi thike pomayovi ga hamano (N$6 000). 

Omalimbililo taga endele ko

Omumwayinakadhona gwanakusa, Ndilimeke Iikela, okwa lombwele oshifokundaneki shoNamibian Sun kutya nomuwayinamati okwa li nomalimbililo kombinga yepambathano lye nokanona hoka manga ina hulitha. "Manga omumwamememati ina hulitha, okwa li pwa holoka oompata pokati ke nayina yokanona mokalaba pethimbo a li a talele po kOwambo," osho a popi. "Pethimbo lyoompata ndhoka, otaku fekelwa yina yokanona a popi kutya okanona kakeshi ke na ota vulu oku ka tekula ye mwene," Iikela osho a gwedha po. 

Okwa gwedha po kutya ompito yokuninga omakonakono guukwatya wopambinzi oya li ya pangelwa pethimbo lyoonkundathana konima yefumviko, ihe Matheus ka li po. 

"Lwanima otwa li twa tumu omukwanezimo opo a ka tseyithile ezimo lye kutya otwa hala okuunganeka omakonakono guukwatya wokondandalunde," osho a popi. 

Iikela okwa popi kutya Matheus okwa li a zimine nehalo lye mwene omakonakono ngoka mokushaina omishangwa ndhoka dha li dha pulwa. 

Okwa tindi omafekelo gokutya ezimo lyawo olyo lya lundulula iizemo mbyoka.

"Taya popi kutya otwa futu omuntu opo a nayipaleke iizemo mbyoka, shoka ka shi shi oshili nando. Tse otwa hala okuya momakonakono omakwawo gombinzi opo kehe omuntu a kale a mbilipalelwa," osho a popi.  

Kombinga yonzapo yevalo yokanona, Iikela okwa popi kutya sigo oompaka otayi adhika kUuministeli wIikwameni. "Ngele iizemo yotango yuukwatya wopambinzi oyi li mondjila, nena edhina lyamumwameme olyi na okudhimwa mo monzapo yevalo ndjoka. Pakathimbo, otatu tegelele iizemo yomakonakono omatiyali," osho a popi. 

Hendrina Henock, ngoka omayeye ge ga li ga longithwa onga gomupambelwe gwopambinzi pethimbo lyomakonakono gotango, okwa shilipaleke kutya omakonakono ngoka gopaukwyata oga ningilwa molabola yopaumwene mOshakati, na Matheus okwa li a shaina omishangwa dhezimino. "Ezimo lyokanona olyi wete omukalo ngoka gwa longithwa ka gwa li pauyuuki. Tse otwi ilongekidha okuya momakonakono omakwawo guukwatya wopambinzi pethimbo kehe taya kala yi ilongekidha opo oshinima shika shi yelithwe po," osho a popi.