• Home
  • Oshiwambo
  • oKabinete 'yondiikwatela' ya keelele oSwapo moonkundathana dhomahooli goshiilongo – Ekandjo
INAA HOKWA: Nakulwomukulo gwo-Swapo Jerry u0027Maudjuuu0027 Ekandjo. ETHANO: LYA GANDJWA
INAA HOKWA: Nakulwomukulo gwo-Swapo Jerry u0027Maudjuuu0027 Ekandjo. ETHANO: LYA GANDJWA

oKabinete 'yondiikwatela' ya keelele oSwapo moonkundathana dhomahooli goshiilongo – Ekandjo

Edward Mumbuu



Nakulwomukulu gwo-Swapo nokwa li minista moKabinete Jerry ‘Maudjuu’ Ekandjo okwa popi kutya shoka a hokolola onga “Okabinete yondiikwatela” otayi kutha mo Ongunduleli momatokolo ngoka taga ungaunga niikwamahooli osho wo iikwahaasa moNamibia, ta kondjitha kutya uuleli owoSwapo, ndele ha epangelo, olyo li na okutokola omakankameno gomahooli goshilongo.


Ekandjo okwa nyenyeta kutya okomitiye onene yo-Swapo, ndjoka yi li oshikondo tashi ningi omatokolo gopombanda pokati kiigongalele iinene, oya undulilwa pomuhulo miipotha yopashigwana noka ya li ya popiwa nayo pamulandu mOshipekelo shOveta yOmahooli, shoka tashi kongo okulundulula oonkondo dhomalandulathano nomikanda okuza kuuministeli wiitopolwa yoomina noonkondo okuya kOmbelewa yOmupresidente. 


Sho a holoka koprohalama yoonkundathana yo-The Agenda, ndjoka yoNamibian Sun Osoondaha ya zi ko, okwa popi kutya omahooli ohaga vulu okupendula omakuyunguto, ta popi kutya iilongo yokuuninginino, mwa kwatelwa America, oya ponokela iilongo yopokati medhina galyo, naNamibia ota vulu okukala oshihakanwa.


“[Ihe] otu na Okabinete yondiikwatela… Uuleli wongundu owu na okuhangana, hapangelo, e tayi totha mo yo tayi ungaunga nondjila yolweetho olutiyali yolugodhi opo tu tothe mo ookuume ketu yoondjungululwamulandu, mboka twa hala okulongela nayo iiyemo ayihe mbika omolwehumokomeho lyaNamibia, e tayi ya totele ondjila peha lyoKabinete,” Ekandjo a ti.

Ekandjo okwa popi kutya onkalo oyi li ya yooloka kwashoka sha li po nale, sho iilyo oyindji yokomitiye yopokati noyepangelo lyopombandanda ya li wo moKabinete, shoka sha gandja oonkondo ondhindjii kuyo momatokolo gepangelo.

“Kandi wete ngele uuleli wongundu owa konakona sha shilwe kombinga yomahooli nohaasa. oKabinete opo ya tokola. Ongundu oyi na okuwilika oKabinete. Kashi shi oKabinete tayi wilike ongundu,” a ti. 

Ekandjo okwa londodha kutya iilongo iinene oya tula omeho gayo kOmahooli gaNamibia nongele inaya ilongekidha, otapu ka kala iizemo ya kwata miiti.

“America oko ashike a tala huka. America okwa hala okukatukila mo,” a ti.


“Ongundu oyi na okuhangana e tayi eta omadhiladhilo kokomityei yopokati, ndjoka yi na okukala omutumba notayi ti, ‘Otu na omahooli nohaasa; otatu uka peni? Ookuume ketu yondjungululwamulandu olye? Olye twa hala okukwashilipaleka kutya olye te ya okutula po iipindi?’”

Okwa popi kutya, peha lyasho, “oKabinete oyo ashike tayi ningi omutumba kuyoyene”.

Onkalathano ya dhama

Omupevi amushangandjayi gwoSwapo komutotimpangu Uahekua Herunga okwa tindi omandhidhiliko ga-Ekandjo, ta ti kutya uuleli wongundu naatotimpangu wayo oya li haya pewa uuyelele pankalondjigilile mOshipekelo shOveta yOmahooli.

Omapopyo ga-Ekandjo otage ya pomutenya konima yomapopyo gomaipumomumwe pokati ka-Nandi-Ndaitwah na-Shaningwa shinasha naShaningwa ngoka a thigwa pondje momatokolo ngoka giipotha ya simana nomalangeko, omapopyo ngoka Herunga a ekelehi.

Okwa hokolola ekwatathano pokati kOmupresidendhe Netumbo Nandi-Ndaitwah naamushangandjayi gwongundu Sophia Shaningwa kutya olya kwata miiti pamuthika gwopombanda.

“Oomvula adhihe ndhoka nda kala mopolotika, inandi mona nando omukalo omwaanawa gwekwatathano pokati komupresidendhe gwoSwapo no-SG gwa fa ngoka gu li pokati kOmupresidendhe Nandi-Ndaitwah na-comrade Shaningwa,” Herunga a ti.

“Lumwe moshiwike, omupresidendhe gwoSwapo [Nandi-Ndaitwah] oha longitha esiku alihe kombelewa onene yongundu opo a ungaunge niipotha yongundu. Esiku alihe. Ihe ashike, ngele oopolotika dhopashigwana dha kwata miiti odhe ya po, ota ungaunga nadho, ihe esiku ndyoka olya nuninwa iipotha yoSwapo,” a gwedha po.

A pewa uuyelele wa gwana

Herunga okwa popi kutya aatotimpangu yo-Swapo oya li ya kutha ombinga momitumba odhindji dhokugandja uuyelele mOshipekelo shOveta yOmahooli noya gandja omadhiladhilo gawo pamwe peha lyoohandimwe.

“Amushangandjayi gwoSwapo oshilyo shoKabinete shomuthika gwethimbo lyuudhila po. Notandi vulu okukupataneka ngashingeyi; ka kuna MP gwo-Swapo e li po ta vulu okutya ina pewa uuyelele mOshipekelo shOveta yOmahooli,” a ti.

“Pethimbo twa gandja omadhiladhilo getu, kasha li shopaumwene ihe oshakwatelamo oSwapo ayihe,” a gwedha po.

Herunga okwa hokolola kutya iimpwiyu yaEkandjo otashi vulika ya zi kokukala kwe inaaya momitumba dhimwe dhongundu, ta dhimbulukitha kutya minista nguka omukulu ke shi oshilyo shepangelo lyopombandambanda nenge kuutotimpangu.

“Omukuluntu gwandje [Ekandjo], ngoka ndi na esimano kuye… ke li mepangelo lyopombandambanda noke shi oshilyo shuutotimpangu noha faula omitumba dhongundu poompito dhimw,” Herunga a ti.

“Ihe shika kashi shi kutya ngele a faula omitumba dhika, mboka ye na okukutha oonkatu momutotimpangu inaya pewa uuyelele. Omutotimpangu gwa li, unene tuu gwOngunduleli, ito vulu okutya, ‘Inatu pewa uuyelele wa gwana’.”

Ya tolokwa ku: Gottrieb Nambahu ([email protected]).   



Comments

Namibian Sun 2026-11-07

No comments have been left on this article

Please login to leave a comment