Epangelo lya yamukula komaindilo goUN Human Rights Council

Epangelo olya holola kutya itali yambidhidha eindilo lyoUnited Nations Human Rights Council opo Namibia a zimine oondjokana nomakwatathano gopaihole pokati kaalumentu naalumentu nenge aakiintu naakiintu.
Pahapu dhaMinista gUuyuki, Albert Kawana ekotampango otali vulu okulundululwa ihe itali vulu okulundululwa esiku limwe.
Okwa yelitha kutya iikumungu yimwe oya pumbwa omaiyuvo gaakwashigwana. Kawana okwa popi kutya ekotampango lyaNamibia itali popile omakwathano pokati kaalumentu naalumentu nenge aakiintu naakiintu ihe omakwathano owala pokati kaakiintu naalumentu.


Kawana okwa popi ontopolwa 14 (1) mekotampango otayi utha kutya aaNamibia aakiintu naalumentu yomuhoko kehe nuukwashigwana kehe otaya vulu okuya moondjokana nokutota oofamili onkene itaku vulu okupitikwa oondjokana dhaantu yuukwatya wumwe oyi li oshimbuluma paveta Combating of Immoral Practices Act 21 yomo- 1980, noveta ndjoka oyi Ii oveta ya thigululwa koshilongo okuza kooveta dhaRoman Dutch.
Pahapu dhoUN Human Rights Council , Namibia okwa pumbwa okutula miilonga oveta ndjoka tayi pitike oondjokana dhaantu yuukwatya wumwe opo ku vule okukandekwa iimbuluma yopaukashike kookantu.
Ehangano ndyoka otali pula woo aantu mboka taya yi momakwatathano ngoka ya vule okukala mokati koshigwana itaya tongolwa.
Ehangano olya pula woo opo aantu mboka yeli kongeshefa yookwiilanditha ya vule okutaambiwako moshigwana yo ya vule okukala taya lopota iipotha yomakwatonkonga niimbuluma yilwe mbyoka taya ningilwa pwaahena okatongo.
UN Human Rights Council, natango oya pula opo Namibia a tule miilonga omulandu ngoka tagu pitika opo aantu ya vule okuninga omakuthomo gomategeleo ga gamenwa.
Ehangano olya popi kutya onkalo ndjoka otayi thiminike aakiintu ya ninge omakuthomo gomategelelo inaga gamenwa na otashi tula moshiponga uundjolowele wawo.
Olopota ndjoka oya holola kutya iipangelo nomandiki guundjolowele moshilongo ihaga gandja omapukululo kaanyasha.
Olopota ndjoka oya ngongwapo komahangano gaashi gepangelo moshilongo oshowo oLegal Assistance Centre (LAC). Oya popi kutya nonando kape na omiyalu dhoka tadhi ulike kutya aakiintu yangapi ya kutha mo omapunda, onkalo otayi holola kutya aakiintu oyendji otaya longitha iinima ya nika oshiponga mokukutha mo omapunda.
Kombinga yekuthomo lyomapunda, Kawana okwa popi kutya shoka oshikumungu sha piyagana, noshigwana osho tashi pewa ompito shi tokole shoshene.



JEMIMA BEUKES