Aakuluntuskola ka ya uvite ombili

Aakuluntuskola oya popi kutya oya kanitha einekelo mehangano lyo Namibia national Teachers Union (Nantu) sha landula sho ehangano ndyoka lya ndopa okuyamukulo komukanda gwomanyenyeto ngoka gwa li gwa shangwa kaakuluntuskola.
Aakuluntuskola oya ningi omutumba mehuliloshiwike lya piti, opo ya kundathane omukalo omuwinayi taya ihumbatelwa nago kepangelo, nokatongo hoka taya ningilwa.
Momukanda ngoka gwa pitithwa komupopiliko gwaakuluntuskola, Amon Oiva Haimbangu okwa popi kutya Nantu, oku na ontseyo yomanyenyeto nomaupyakadhi gawo ngoka ye na ihe ke na shoka a ningi po.
Onkalo ndjoka oye ya thiminike ya totepo olutu lwawo, opo ya vue okugandja omanyenyeto gawo kepangelo yoyene.
“oshidhigu okuuvako kutya omolwashike aakuluntuskola taya ningilwa okatongo mokumona uuwanawa wiiyenditho nomagumbo. Aakuluntuskola oya tindilwa omauwanawa ngoka konima nkene kwa tulwa miilonga omauwanawa ngoka muApilili gwomvula ya piti. Inaku gandjwa omatompelo nenge omayelitho kutya omolwashike .”
Aakuluntuskola mboka oya gwedha po kutya aakuluntuskola owala mboka haya longele epangelo oyo haya longitha iiyenditho yawo yopaumwene uuna taya gwanithwa po iilonga yepangelo.
“Aakuluntuskola otaya pumbiwa ya ze koombelewa dhawo dhiilonga okuya koombelewa dhelongo dhopashtopolwa, koombelewa dhelongo dhopashikandjo ihe kape na iiyenditho yepangelo mbyoka taya vulu okulongitha esiku kehe,” Haimbangu a popi.
Sho a ningilwa omapulaapulo, omupevi omupresidende gwoNantu, Joseph Dinyando okwa popi kutya ita vulu okutya ko sha manga.

JEMIMA BEUKES