Nujoma a popifa ovanangeshefa mOngwediva

Nonande Namibia okwa hanga omafindano manene moule womido 22 demanguluko, oshilongo onghee ngo sha taalela omashongo oo taa pula keshe Omunamibia a dane onghandangala, do eedjo dopaushitwe di longifwe mouwa woshiwana.

Edi oda popiwa kOmukokolipresende Sam Nujoma pefimbo loitendele ya li mOngwediva Trade Fair Centre mEtitatu konguloshi.

Oitendele oya li ya longekidwa owina koshitaimbelewa shondjuwo yoipindi noikwafabulika moNamibia (NCCI) mOnooli.

Nujoma okwa ti Epangelo laNamibia ola tula omufindo moshikondo shounamapya shaashi kape na oshilongo otashi kala she lifikamena ngeenge ihashi longo oikulya ya wana.

Okwa ti Epangelo ohali yandje oshimaliwa nelalakano lokuxumifa komesho nokuyambula po eeprojeka dopaunamapya oshoyo okweeta po eemhito neenhele domalandifilo oilongomwa yomomapya, mOvenduka, mOngwediva nomoRundu.

Okwa ti Epangelo laNamibia natango ola itavela momulandu wopamaxupilo wondubakanifwa, omo Epangelo noikondo yopaumwene tava dana onghandangala ya fimana mokweeta po eemhito doilonga opo ku shunifwe pedu oluhepo moshilongo.

Nujoma okwa ti onghendabala yokweeta po eemhito doilonga itai pondola sha ngeenge itaku xumifwa komesho eengeshefa dopetameko nodomufika wopokati.

Omukokolipresidende okwa ti oshikondo shounangeshefa wopetameko nowomufika wopokati otau dulu okudana onghandandala ya fimana ngee wa pewa eyambido la pumbiwa.

Nujoma okwa ti NCCI oya fimana noya pumbiwa onga ondjila omo tamu pitile exumifokomesho leengeshefa di dule okuhanga omafindano molwa ouwa wOvanamibia aveshe.

Okwa indila NCCI i twikile nokuxwaxwameka ounangeshefa we likolelela komikalo diwa, efimanekafano, oukwashili nokoudiinini moilonga oshoyo okulombwela oshiwana shi kale hashi lande oinima oyo ya longwa moshilongo.

Okwa pandula NCCI eshi ya longekida oitendele yowina oyo ya li yo nelalakano lokuyandja olupandu kovanangeshefa ovadalelwamo ovo veshi endifa nawa nova pondola sha pangeshefa, nopamukalo ou va yandja oshiholelwa shiwa.

Kakele koshipopiwa shaye poitendele yoNCCI mOngwediva, Omukokolipresidende okwa kala yo poiningwanima ihapu yopambelwa mOnooli oule woshivike, mwa kwatelwa etalelopo pofikola Iipanda Yaamiti neyeululo lopambelewa longeshefa yoB.H. Group of Companies mOutapi.