Gerson a dipawa komutekulu

Oshifokundaneki shoNamibian Sun osha ninga omapulaapulo apa naapenya, shina sha nedipao la Gerson Ndemulunda, ashike fiyo okeluwa eli inaku monika ouyelele wofaafaa tau holola nokutya edipao ola etifwa koshike nola enda naanaa ngahelipi.

Ouyelele ou twa li twa mona petameko owa li tau ti Ndemulunda okwa li e na omutekulu waye ta yahama nokwa li ta mono epango moAngola, na Ndemulunda okwa li nee a ya ko a ka tale nokutya ove li po ngahelipi, ashike mokati koufiku wokupendukila Olomakaya okwa ponokelwa komutekulu waye nekuva, naashi a wila poshi omuponokeli okwa kufa ekatana ndee temu longele oilonga youbalabali.
Ovapolifi pOmuvelo waKashamane ova koleka oshiningwanima, ashike inava dula okuyandja ouyelele we lixwapo shaashi havo ve na oshinakuwanifwa shokuyandja ouyelele koikundaneki.

Eshi oshifokundaneki shoNamibian Sun sha talela po oshuumbo, ovapambele va nakufya ova popya tava ti Ndemulunda okwa li a ya koAngola konima eshi omutekulu waye e mu dengela ongodi ta ti na ye e ke mu talele po.

“Ina tu mona nale edipao la tya ngaha,” osho David Shalonga, okandenge kanakufya Ndemulunda, a lombwela oshifo eshi.

Nonande ka li manga ta dulu okuyandja ouyelele nokutya oshike naanaa sha etifa edipao, Shalonga okwa ti omulumenhu ou ta fekelelwa edipao okwa tekulwa mooxekulu Ndemulunda na omo a kala fiyo osheshi a ka konga oilonga kOushimba.

Omudimba wa nakufya ou li kokila kOshikuku, omanga ou ta fekelelwa edipao a idililwa kOutapi.
Komanda woPolifi mOshitukulwa shaMusati Simeon Shindinge okwa ti omufekelwa medipao laNdemulunda ota fekelwa yo nokutya ke li nawa momutwe.

“Kakele kokufekelelwa edipao, okwa patelwa mo opo a ha tule eameno lovanhu vamwe neameno laye mwene moshiponga,” osho Shindinge a ti nokwa weda ko ta ti omufekelwa okwa kendabala okulidipaa oikando itatu.

Okwa teelelewa Omapangelo oilongo ivali a ye meenghundafana diva opo omufekelwa a dule okutwala koAngola a ka pangulwe, ashike omulandu wa tya ngaha otashi dulika u katashwe opo ku talike manga ngeenge omufekelwa oku li tuu nawa mouluvi, nongeenge sha monika nokutya ke li nawa, nena otashi ka djuupala oku mu yandja kEpangelo laAngola.

Oshinima vali shimwe, oveta yaNamibia otai ufa nokutya omudimba womunhu keshe a fya efyo lihe fi lopaushitwe ou na okutandwa. Ashike, opo omudimba u tandwe ope na okukala pe na epeko lopolifi. Moshiningwanima eshi, omulandu ou itau dulu okulandulwa shaashi edipao inali ningilwa moNamibia nopolifi inai patulula epeko.

Ashike omukulunhu wopolifi mOmusati ota ti otava ningi keshe osho tashi dulika opo ku kwafelwe ovapambele vanakufya va dule okuninga epako.

Ouyelele wa wedwa po u nasha na nakufya inau dula manga okumonika molwaashi ava ve na oufemba okuuyandja ova li ve lipyakidila neembelewa.