Ovaitaveli va tameka efi mbo lelidiliko

Onghela (Etitatu) ola li efiku letameko lefimbo lelidiliko nelidilululo, efimbo olo Ovakriste tave lilongekidile oshivilo shOpaasa osho neudo tashi ka tyapulwa mexuliloshivike lomafiku 6 fiyo 8 April.

Ovakriste vahapu ova li va ya komalongelo-Kalunga onghela ongula, ashike momaongalo amwe oshivilo osha undulilwa kOsoondaha opo ku yandjwe yo omhito kovanailonga ovo va li itava dulu okukala pomalongelo-Kalunga mokati koshivike.

Moule woivike ihamano ya tetekela Opaasa, Ovawiliki vopamhepo veengeleka ngaashi Ongeleka onghwaLutheri, Anglikana, Katoolika, Methodist na Presbyterian otava kala unene tave udifa elidiliko nelidilululo nokutula omufindo momahepeko aJesus Kristus. Onghalo pomalongelo-Kalunga pefimbo eli ohai kala ya nyika oufiye novaitaveli ohava henuka omaimbilo taa holola ehafo, unene tuu oo e na oshitya “Halleluiah”.

Manga nee Ovakriste ava va itavela mefimbo lelidiliko ve likolelela unene komatumbulo omOmbibeli ngaashi 2 Samuel 13:19; Job 2:8, Daniel 9:3 noshotuu, ope na yo Ovakriste vamwe ovo tava ti kave wete sha pumbiwa okudimbulukwa nokufimaneka omafiku onhumba. “Okukalamwenyo kwOmukriste oko elidiliko nelidilululo, onghee paitavelo letu, omafiku owina inaa pumbiwa,” osho omuudifi umwe womOshakati a popya meenghundafana noNamibian Sun.